ଇରାକ୍ ଓ ସିରିଆ ଉପରେ ଆମେରିକାର ଏୟାର ଷ୍ଟ୍ରାଇକ୍
ୱାଶିଂଟନ୍: ରବିବାର ଇରାକ୍ ଓ ସିରିଆର ଆତଙ୍କବାଦୀ ଗୋଷ୍ଠୀ ଉପରେ ଆମେରିକା ଏୟାର ଷ୍ଟ୍ରାଇକ୍ କରିଛି । ପେଣ୍ଟାଗନର ଗଣମାଧ୍ୟମ ସଚିବ ଜନ କିରବି ଏନେଇ ସୂଚନା ଦେଇଛନ୍ତି । ଜୁନ୍ ଆରମ୍ଭରେ ଇରାକ ଉପରେ ଏକ ରକେଟ୍ ଆକ୍ରମଣ ହୋଇଥିଲା । ଏଥିରେ ଆମେରିକା ସୈନ୍ୟ ସହ ଅନ୍ୟ ସହବନ୍ଧିତ ସେନା ଆହତ ହୋଇଥିଲେ । କୁହାଯାଇଛି ଏହାର ଜବାବରେ ଆମେରିକା ଏଭଳି ଏୟାର ଷ୍ଟ୍ରାଇକ୍ କରିଛି ।
ଅନ୍ତର୍ଜାତୀୟ ନ୍ୟୁଜ୍ ଏଜେନ୍ସି ରୟଟର୍ସ ଅନୁସାରେ, ଅଧିକାରୀ କହିଛନ୍ତି ଇରାକରେ ହୋଇଥିବା ରକେଟ୍ ଆକ୍ରମଣର ଜବାବରେ ଏହି ଏୟାର ଷ୍ଟ୍ରାଇକ୍ କରାଯାଇଛି । ସିରିଆରେ ଇରାନ୍ ସମର୍ଥିତ ଏହି ଗୋଷ୍ଠୀ ଇସ୍ରାଏଲ୍ ପାଇଁ ବଡ଼ ବିପଦ ବୋଲି କୁହାଯାଉଛି । ଏଥିଯୋଗୁଁ ଆମେରିକାର ଏହି କାର୍ଯ୍ୟାନୁଷ୍ଠାନ ବେଶ୍ ଗୁରୁତ୍ୱବହନ କରୁଛି ।
ସିରିଆର ୨ଟି ସ୍ଥାନ ଓ ଇରାକର ଗୋଟିଏ ସ୍ଥାନ ଉପରେ ଆମେରିକା ଏହି ଆକ୍ରମଣ କରିଛି । ଟାର୍ଗେଟ କରାଯାଇଥିବା ସ୍ଥାନରେ ଇରାନ୍ ସମର୍ଥିତ ମିଲିସିଆ ଗୋଷ୍ଠୀ ରହୁଥିବା କହିଛି ପେଣ୍ଟାଗନ । ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ନିର୍ଦ୍ଦେଶରେ ଏହି ଏୟାର୍ ଷ୍ଟ୍ରାଇକ୍ ହୋଇଛି ।
