ଅସୁରକ୍ଷିତ ବ୍ରହ୍ମପୁର: ଦିନ ଦ୍ବିପ୍ରହରରେ ଘଟୁଛି ହତ୍ୟାକାଣ୍ଡ, ଛିନତାଇ, ରାହାଜାନୀ ଆଦି ଘଟଣା

ବ୍ରହ୍ମପୁର: ଘର ବନ୍ଦ କରି ବୁଲିବାକୁ ଯାଉଛନ୍ତି କି ? ସାବଧାନ ! କୌଣସି ସମୟରେ ଘରେ କଳାକନା ବୁଲାଇ ପାରନ୍ତି ଲୁଟେରା । ଘରେ ଥିଲେ ବି ସୁରକ୍ଷିତ ନୁହେଁ ଧନ ସମ୍ପତ୍ତି । ବ୍ରହ୍ମପୁର ସହରରେ ମାତିଛନ୍ତି ଲୁଟେରା । ନିମଖଣ୍ଡି ଥାନା ଗୁରୁଣ୍ଡି ନିକଟସ୍ଥ ଟେକ୍ନୋପାର୍କ ହାଉସିଂ ଅଞ୍ଚଳରେ ଗୋଟିଏ ରାତିରେ ୫ଟି ଘରେ ସିରିଜ୍ ଚୋରି କରିଛନ୍ତି ଲୁଟେରା । ୫ଟି ଘରେ କଳାକନା ବୁଲାଇବା ସହ ୨ଟି ଘରୁ ଚୋରି ଉଦ୍ୟମ କରିଛନ୍ତି । ଅଭିଯୋଗ ପରେ ପୋଲିସ ଓ ସାଇଣ୍ଟିଫିକ୍ ଟିମ୍ ଘଟଣାର ତଦନ୍ତ କରୁଛି । ଏହି ହାଉସିଂ ଅଞ୍ଚଳରେ ଥିବା ଆପାର୍ଟମେଣ୍ଟ ଗୁଡ଼ିକରେ ପାଖାପାଖି ୧୩୦ ପରିବାର ରହୁଛନ୍ତି । ହେଲେ ରାତିରେ ଦୁର୍ବୃତ୍ତ ହିମାଂଶୁ ଶେଖର ସାହୁ, ଲକ୍ଷ୍ମୀ ନାରାୟଣ ନାୟକ, ତୁଣ ବାବୁ, ସୀମାଞ୍ଚଳ ପାଢ଼ୀ ଓ ସନ୍ତୋଷ ମିଶ୍ରଙ୍କ ଘରେ ପଶି ଲୁଟି ନେଇଛନ୍ତି ଲକ୍ଷାଧିକ ଟଙ୍କାର ସୁନାଗହଣା । ତେବେ ଅନ୍ୟ ୨ ଜଣ ବ୍ୟକ୍ତିଙ୍କ ଘରୁ ଚୋରି କରିବାକୁ ଉଦ୍ୟମ କରି ବିଫଳ ହୋଇଛନ୍ତି । ଖାଲି ସେତିକି ନୁହେଁ ଆଙ୍କୁଲି ଅଞ୍ଚଳରେ ମଧ୍ୟ କିଛି ଦୁର୍ବୃତ୍ତ ସାହିରେ ଆତଙ୍କ ଖେଳାଇ ବାଇକ ଗୁଡ଼ିକୁ ଭାଙ୍ଗୁଥିବା ଦୃଶ୍ୟ ସିସିଟିଭିରେ କଏଦ ହୋଇଛି ।

ଗତ କିଛିଦିନ ହେଲା ବ୍ରହ୍ମପୁରରେ ବିଗିଡ଼ିବାରେ ଲାଗିଛି ଆଇନଶୃଙ୍ଖଳା । ଫେବ୍ରୁଆରୀ ୨ ତାରିଖ ରେ ବୈଦ୍ୟନାଥପୁର ଥାନା ଅଧୀନ ଆଙ୍କୁଲି ଶ୍ମଶାନରେ ଜଣେ ଅଟୋ ଚାଳକଙ୍କୁ ଆକ୍ରମଣ କରି ଟଙ୍କା ଲୁଟି ନେଇଥିଲେ । ତାଲା ବନ୍ଦ ଘର ଓ ନିର୍ମାଣ ଘରକୁ ଟାର୍ଗେଟ କରୁଛନ୍ତି ଲୁଟେରା । ବୋମା ମାଡ଼ ଓ ହତ୍ୟା ଘଟଣା ବି ବଢିବାରେ ଲାଗିଛି । କେତେବେଳେ କାହାକୁ ଅପହରଣ କରି ନେଉଛନ୍ତି ଦୁର୍ବୃତ୍ତ । ଠାକୁରାଣୀ ଯାତ୍ରା ଓ ଦଣ୍ଡଯାତ୍ରା ସମୟରେ ଏପରି ଘଟଣା ପୋଲିସର କାର୍ଯ୍ୟଦକ୍ଷତା ନେଇ ଉଠାଇଛି ପ୍ରଶ୍ନ ।