ଅନଲକ୍ ୪.୦ରେ ପୁଣି ଗଡିଛି ରାଜ୍ୟ ସଡକ ପରିବହନର ବସ୍

ଭୁବନେଶ୍ୱର: ଦେଶରେ ସେପ୍ଟେମ୍ବର ୧ରୁ ଅନଲକ୍ ୪.୦ ଲାଗୁ ହୋଇଛି । ଅନଲକ୍ ୪.୦ ପର୍ଯ୍ୟାୟରେ ଅନେକ ପରିବର୍ତ୍ତନ କରାଯାଇଛି । ଅଧିକାଂଶ କଟକଣାକୁ କୋହଳ କରାଯାଇଛି । ସରକାରଙ୍କ ଅନୁସାରେ ଅଗଷ୍ଟରେ ଘୋଷଣା କରାଯାଇଥିବା କିଛି ନିୟମ ସେପ୍ଟେମ୍ବର ପହିଲାରୁ ଲାଗୁ ହେବ । ଅନଲକ୍ ୪.୦ ପାଇଁ ଗାଇଡଲାଇନ୍ ମଧ୍ୟ ଜାରି କରାଯାଇଛି । ଅନଲକ୍ ୪.୦ରେ କୋହଳ ହୋଇଛି କଟକଣା । ଦିଲ୍ଲୀରେ ମେଟ୍ରୋ ସେବା ଆରମ୍ଭ ହେବା ସହିତ ଓଡ଼ିଶାରେ ବସ ଚଳାଚଳ ସ୍ୱାଭାବିକ୍ ହୋଇଛି । ଲୋକଙ୍କ ଗମନାଗମନରେ ସୁବିଧା ପାଇଁ ଆରମ୍ଭ ହୋଇଛି ବସ୍ ସେବା ।

ଉଭୟ ସରକାରୀ ଓ ବେସରକାରୀ ବସ ଚଳାଚଳ ସ୍ୱାଭାବିକ୍ ହୋଇଛି । ଦୀର୍ଘ ଦିନର ବ୍ୟବଧାନ ପରେ ଆଜି ଠାରୁ ରାସ୍ତାରେ ପୁଣି ଗଡିଛି ରାଜ୍ୟ ସଡକ ପରିବହନର ବସ୍ । ପ୍ରଥମ ଦିନରେ ୧୪ଟି ଡିପୋରୁ ୨୯ଟି ରୁଟରେ ୬୦ରୁ ଅଧିକ ବସ୍ ଚାଲିଛି । ଏନେଇ ସୂଚନା ଦେଇଛନ୍ତି ଓଏସ୍ଆରଟିସିର ପରିଚାଳନା ନିର୍ଦ୍ଦେଶକ ଅରୁଣ ବୋଥ୍ରା । ରାଜ୍ୟରେ ଚାଲିଥିବା ଜେଇଇ ପରୀକ୍ଷା ପାଇଁ ପରୀକ୍ଷାର୍ଥୀଙ୍କ ସୁବିଧା ପାଇଁ ଏହି ବସ୍ ସେବା ସହାୟକ ହେବ ବୋଲି ଆଶା କରାଯାଇଛି । ତେବେ ବସରେ ଯାତ୍ରା କରିବାକୁ ହେଲେ ମାସ୍କ ପିନ୍ଧିବା ବାଧ୍ୟତାମୂଳକ ଥିବାବେଳେ ଠିଆ ହୋଇ ଯାତ୍ରା କରିବା ଉପରେ ଲାଗିଛି କଟକଣା ।