୮ ଲକ୍ଷ ଟଙ୍କାର ଦୁଇ ହଜାରିଆ ନୋଟ୍ ମନ୍ଦିରକୁ ଦେଲେ ଅଜ୍ଞାତ ଭକ୍ତ

କାଙ୍ଗ୍ରା: ଦେଶରେ ଦୁଇ ହଜାର ଟଙ୍କିଆ ନୋଟ୍ ବନ୍ଦ ହେବା ନେଇ ସୂଚନା ମିଳିବା ପରେ ଦେବୀଙ୍କ ମନ୍ଦିରର ୮ ଲକ୍ଷ ଟଙ୍କା ଦାନ କଲେ ଅଜ୍ଞାତ ଭକ୍ତ । ହିମାଚଳ ପ୍ରଦେଶର ମା ଜ୍ୱାଲାମୁଖୀ ମନ୍ଦିରରେ ଜଣେ ଶ୍ରଦ୍ଧାଳୁ ଦୁଇ ହଜାର ଟଙ୍କିଆ ୪୦୦ ନୋଟ୍ ଚଢାଇଛନ୍ତି । ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି।

ନଗର ପରିଷଦ ଜ୍ୱାଲାମୁଖୀର ଅଧ୍ୟକ୍ଷ ଧର୍ମେନ୍ଦ୍ର ଶର୍ମା କହିଛନ୍ତି,  ସେପ୍ଟେମ୍ବର ଯାଏଁ ବ୍ୟାଙ୍କରେ ଦୁଇ ହଜାର ଟଙ୍କିଆ ନୋଟକୁ ପରିବର୍ତ୍ତନ କରାଯାଇପାରିବ । ଏଭଳି ସମୟରେ ଦାନ ହୋଇଥିବା ଟଙ୍କା ମନ୍ଦିରର ବିକାଶ କାମରେ ଲାଗିପାରିବ । ତେବେ ଏହି ମାମଲାରେ ତଦନ୍ତ ଆରମ୍ଭ ହୋଇଥିବା କହିଛନ୍ତି କାଙ୍ଗ୍ରା ଡିସି ନିପୁଣ ଜିନ୍ଦଲ।

ଗତ ମେ ମାସରେ ଭାରତୀୟ ସେନାର ଡୋଗରା ରେଜିମେଣ୍ଟର ୨୦ ତମ ବାଟାଲିୟନ୍ ର ଅଧିକାରୀ ଓ ଯବାନ ମାନେ ମନ୍ଦିରର ସ୍ମୃତି ଚିହ୍ନ ଭାବେ ୪୦୦ କିଲୋଗ୍ରାମର ପିତଳ ଧାତୁର ଦୁଇଟି ସିଂହ ଦାନ କରିଥିଲେ । ସ୍ମୃତି ଚିହ୍ନର ସ୍ଥାପନା ସମୟରେ ଡୋଗରା ରେଜିମେଣ୍ଟର ବହୁ ଅଧିକାରୀ ଉପସ୍ଥିତ ଥିଲେ ।

ମନ୍ଦିରରେ ଜଳୁଛି ୯ ଜ୍ୟୋତି-

ହିମାଚଳ ପ୍ରଦେଶର କାଙ୍ଗ୍ରା ଘାଟିରୁ ଦକ୍ଷିଣରେ ୩୦ କିମି. ଦୂର ଏବଂ ଧର୍ମଶାଳାରୁ ୫୬କିମି. ଦୂରରେ ରହିଛି ଜ୍ୱାଳାଜୀ ମନ୍ଦିର । କାଙ୍ଗଡା ଘାଟିରେ ଜ୍ୱାଳା ଦେବୀ ମନ୍ଦିରରେ ରହସ୍ୟମୟ ଭାବେ ଜଳୁଥାଏ ୯ ଅନନ୍ତ ଅଗ୍ନୀଶିଖା । ଏହି ସ୍ଥାନ ହିନ୍ଦୁ ତୀର୍ଥଯାତ୍ରାଙ୍କୁ ଆକୃଷ୍ଟ କରିଥାଏ । ତେବେ ଏଠାରେ ମାଆଙ୍କର କୋଣସି ମୂର୍ତ୍ତି ପୂଜା ହୋଇନଥାଏ। ବରଂ ପୃଥିବୀ ଗର୍ଭରୁ ବାହାରିଥିବା ୯ଟି ଜ୍ୟୋତିକୁ ଏଠାରେ ପୂଜା କରାଯାଏ। ଏହି ଜ୍ୟୋତିକୁ ଦେଖିବା ପାଇଁ ଭକ୍ତଙ୍କ ସମାଗମ ହୋଇଥାଏ।

 କ’ଣ ରହିଛି ରହସ୍ୟ-

କୁହାଯାଏ ଏହି ଅଗ୍ନୀଶିଖା ହେଉଛି ମାତା ସତୀଙ୍କର ଜିହ୍ଵା । ବିଶ୍ୱାସ ଅନୁସାରେ ଦେବଦେବ ମହାଦେବ ମାତା ସତୀଙ୍କ ମୃତ ଶରୀର ଧରି ତାଣ୍ଡବ ନୃତ୍ୟ କରିବା ସମୟରେ ମାତା ସତୀଙ୍କର ଶରୀରର ବିଭିନ୍ନ ଅଶଂ ଭାରତର ଅନେକ ସ୍ଥାନରେ ପଡ଼ିଥିଲା । ଆଉ କାଙ୍ଗ୍ରାର ଏହି ସ୍ଥାନରେ ମାତା ସତୀଙ୍କର ଜିହ୍ଵା ପଡ଼ିଥିଲା । ସେହି ଜ୍ୱାହା ଅଗ୍ନୀ ସ୍ୱରୁପା ଭାବରେ ଏଠାରେ ଆବିର୍ଭୁତ ହୋଇ ଉପାସିତ ହେଉଛନ୍ତି ।  ତେବେ ଦୁନିଆରେ ଏମିତି କିଛି ରହସ୍ୟମୟ ସ୍ଥାନ ରହିଛି ଯାହାକୁ ନିଜ ଆଖିରେ ନ’ଦେଖିଲେ ବିଶ୍ୱାସ କରିପାରିବେ ନାହିଁ ।