ଜଲେଶପଟ୍ଟା ଆଶ୍ରମ ଉଡ଼ାଇଦେବାକୁ ସ୍ୱାମୀଜୀଙ୍କୁ ଧମକ
ବାଲିଗୁଡ଼ା: ଲକ୍ଷ୍ମଣାନନ୍ଦ ସରସ୍ୱତୀଙ୍କ ଦ୍ୱାରା କନ୍ଧମାଳ ଜିଲ୍ଲାର ତୁମୁଡ଼ିବନ୍ଧରେ ପ୍ରତିଷ୍ଠିତ ଆଶ୍ରମକୁ ଉଡ଼ାଇ ଦେବାକୁ ଧମକ । କେହି ଜଣେ ଅଜଣା ବ୍ୟକ୍ତି ତୁମୁଡ଼ିବନ୍ଧ ଜଲେଶପଟ୍ଟା ଆଶ୍ରମ ଉଡ଼ାଇ ଦେବାକୁ ଧମକ ଦେଇଛନ୍ତି । ଜଲେଶପଟ୍ଟା ଆଶ୍ରମ ମୁଖ୍ୟ ସ୍ୱାମୀ ଜୀବନମୁକ୍ତନନ୍ଦ ପୁରୀଙ୍କୁ ଅଜଣା ବ୍ୟକ୍ତି ଫୋନରେ ଧମକ ଦେଇଛନ୍ତି ।
ଫୋନ୍ କରିଥିବା ଅଜଣା ବ୍ୟକ୍ତି ନିଜକୁ ନକ୍ସଲ ପରିଚୟ ଦେଇଥିବା ବେଳେ ହତ୍ୟା ସହ ଆଶ୍ରମ ଉଡ଼ାଇ ଦେବାକୁ ଧମକ ଦେଇଥିବା ଜଣାପଡ଼ିଛି । ଏନେଇ ଆଶ୍ରମ ମୁଖ୍ୟ ସ୍ୱାମୀଜୀ ଜୀବନ ମୁକ୍ତନନ୍ଦ ପୁରୀ ତୁମୁଡ଼ିବନ୍ଧ ଥାନାରେ ଲିଖିତ ଅଭିଯୋଗ କରିଥିବା ବେଳେ ପୋଲିସ୍ ଛାନଭିନ୍ ଆରମ୍ଭ କରିଛି । ଜଲେଶପଟ୍ଟା ଆଶ୍ରମକୁ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ପ୍ରତିଷ୍ଠା କରିଥିଲେ ।
୨୦୦୮ ମସିହା ଅଗଷ୍ଟ ୨୩ ତାରିଖ ସନ୍ଧ୍ୟାରେ ଜନ୍ମାଷ୍ଟମୀ ଦିନ ଲକ୍ଷ୍ମଣାନନ୍ଦ ସରସ୍ୱତୀଙ୍କ ସହ ୪ ଜଣଙ୍କୁ ହତ୍ୟା କରାଯାଇଥିଲା । ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ୧୯୬୯ ମସିହାରେ ଚକାପାଦରେ ବାଳକ ଆବାସିକ ବିଦ୍ୟାଳୟ ପ୍ରତିଷ୍ଠା କରିଥିଲେ । ଏହାର ୨୦ ବର୍ଷ ପରେ ୧୯୮୯ରେ ତୁମୁଡ଼ିବନ୍ଧର ଜଲେଶପଟ୍ଟାରେ ପ୍ରତିଷ୍ଠା କରିଥିଲେ କନ୍ୟାଶ୍ରମ ।
