କେନ୍ଦ୍ର ବିରୋଧରେ ଆନ୍ଦୋଳନକୁ ଓହ୍ଲାଇବ ବ୍ୟବସାୟୀ ସଂଘ

ନୂଆଦିଲ୍ଲୀ: ପୂରା ବଜାରକୁ ଖାଇଗଲେଣି ଅନଲାଇନ ମାର୍କେଟିଂ  । ସବୁ ଜାଣି ଚୁପ୍ ବସିଛି କେନ୍ଦ୍ର । କେନ୍ଦ୍ରର ମନମୁଖୀ କାରବାର ବିରୋଧରେ ଆଜିଠୁ ଆନ୍ଦୋଳନକୁ ଓହ୍ଲାଉଛନ୍ତି ବ୍ୟବସାୟୀ ସଂଘ । ଆଜି କନ୍ଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ-କେଟ୍ର ରାଜ୍ୟ ମୁଖ୍ୟାଳୟ ଆଗରେ ବିକ୍ଷୋଭ ଓ ପ୍ରତିବାଦ କରିବେ ଖୁଚୁରା ବ୍ୟବସାୟୀ । ୧୫ରୁ ୧୮ ପର୍ଯ୍ୟନ୍ତ ବିଦେଶୀ ଅନ୍ଲାଇନ୍ ସଂସ୍ଥାଙ୍କ କୁଶପୁତ୍ତଳିକା ଦାହ କରିବ ସଂଘ ।

୨୨ ଓ ୨୩ ତାରିଖରେ ସବୁ ରାଜ୍ୟର ସାଂସଦମାନଙ୍କୁ ସ୍ମାରକ ପତ୍ର ପ୍ରଦାନ କରିବା ସହିତ ୨୯ ତାରିଖରେ ସବୁ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ କେଟ୍ ପକ୍ଷରୁ ପ୍ରଦାନ କରାଯିବ ସ୍ମାରକ ପତ୍ର । ସାଧାରଣ ଖୁଚୁରା ବ୍ୟବସାୟୀ ପାଇଁ ଜିଏସଟି ଜଟିଳ ପରିସ୍ଥିତି ସୃଷ୍ଟି କରିଛି  । ରିଟେ୍ଲ ବ୍ୟବସାୟରେ ବିଦେଶୀ ସଂସ୍ଥାମାନଙ୍କ କାରବାର ଉପରେ କେନ୍ଦ୍ରର କୌଣସି ନିୟନ୍ତ୍ରଣ ରହୁନାହିଁ । ଯାହାଫଳରେ ଦେଶର ପ୍ରାୟ ୧୩ କୋଟି ଖୁଚୁରା ବ୍ୟବସାୟୀ ପ୍ରଭାବିତ ହେଉଛନ୍ତି । ଏ ସମ୍ପର୍କରେ କେନ୍ଦ୍ର ତ୍ବରିତ ପଦକ୍ଷେପ ନେବାକୁ ଦାବି କରିଛି ସଂଘ  ।