ଅନୁପ୍ରବେଶକାରୀ ଓ ଶରଣାର୍ଥୀଙ୍କ ମଧ୍ୟରେ ପାର୍ଥକ୍ୟ ଜାଣନ୍ତି ନାହିଁ: ମମତାଙ୍କୁ ଏମିତି ଜବାବ ଦେଲେ ଅମିତ ଶାହା
ନୂଆଦିଲ୍ଲୀ: ନାଗରିକତା ସଂଶୋଧନ ଆଇନ୍ (ସିଏଏ) ସାରା ଦେଶରେ ଲାଗୁ ହୋଇସାରିଛି । ଏହାକୁ ନେଇ ବିରୋଧୀ ବିବାଦ କରୁଥିବା ଦେଖିବାକୁ ମିଳିଛି। ଆଉ ଏହାରି ଭିତରେ ସିଏଏକୁ ନେଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଦେଇଥିବା ବୟାନର କଡା ଜବାବ ରଖିଛନ୍ତି ଗୃହମନ୍ତ୍ରୀ ଅମିତ ଶାହା । ଶାହା କହିଛନ୍ତି, କୌଣସି ବି ପରିସ୍ଥିତିରେ ସିଏଏକୁ ପ୍ରତ୍ୟାହାର କରାଯିବ ନାହିଁ ।
କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଏକ ସାକ୍ଷାତକାରରେ ସିଏଏ ବିଜ୍ଞପ୍ତି ଉପରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବୟାନ ଉପରେ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ତୃଣମୂଳ କଂଗ୍ରେସ ପ୍ରମୁଖ ଅନୁପ୍ରବେଶକାରୀ ଓ ଶରଣାର୍ଥୀଙ୍କ ମଧ୍ୟରେ ପାର୍ଥକ୍ୟ ଜାଣନ୍ତି ନାହିଁ । ସେ କହିଛନ୍ତି, ‘ମମତା ବାନାର୍ଜୀଙ୍କୁ ଆବେଦନ କରିବାକୁ ଚାହୁଁଛି କି ସେ ଏହାକୁ ନେଇ ରାଜନୀତି କରନ୍ତୁ ନାହିଁ। ରାଜନୀତି ପାଇଁ ଅନେକ ମଞ୍ଚ ପଡିଛି। ଦୟାକରି ବାଂଲାଦେଶରୁ ଆସିଥିବା ବଙ୍ଗୀୟ ହିନ୍ଦୁମାନଙ୍କୁ ବିରୋଧ କରନ୍ତୁ ନାହିଁ। ଶରଣାର୍ଥୀଙ୍କୁ ନାଗରିକତା ଦେବାକୁ ବିରୋଧ କରୁଥିବା ଲୋକଙ୍କୁ ଦେଶବାସୀ ସାଥ୍ ଦେବେନି ବୋଲି ଶାହା କହିଛନ୍ତି ।
ଶାହା ଆହୁରି ମଧ୍ୟ କହିଛନ୍ତି ଯେ ଯଦି ମମତା ଏହି ପ୍ରସଙ୍ଗରେ ରାଜନୀତି କରନ୍ତି ଏବଂ ଏଭଳି ଏକ ଗୁରୁତ୍ୱପୂର୍ଣ୍ଣ ଜାତୀୟ ସୁରକ୍ଷା ପ୍ରସଙ୍ଗ ବିରୋଧରେ ଠିଆ ହୁଅନ୍ତି, ତେବେ ଏହା ଅତ୍ୟନ୍ତ ଭୁଲ। ସେ କହିଛନ୍ତି ଯେ, ମମତା ତୁଷ୍ଟୀକରଣ ରାଜନୀତି କରି ଅନୁପ୍ରବେଶକୁ ଅନୁମତି ଦିଅନ୍ତି ଏବଂ ସିଏଏକୁ ବିରୋଧ କରନ୍ତି । ଯଦି ଶରଣାର୍ଥୀଙ୍କୁ ନାଗରିକତା ନ ମିଳେ ତେବେ ସେମାନେ ସେମାନଙ୍କ ସହ ରହିବେ ନାହିଁ ବୋଲି ଶାହା କହିଛନ୍ତି। ମମତା ବାନାର୍ଜୀ ଅନୁପ୍ରବେଶକାରୀ ଓ ଶରଣାର୍ଥୀଙ୍କ ମଧ୍ୟରେ ପାର୍ଥକ୍ୟ ଜାଣନ୍ତି ନାହିଁ।
ଅମିତ ଶାହା ଆହୁରି କହିଛନ୍ତି ଯେ ସିଏଏକୁ ପ୍ରତ୍ୟାହାର କରିବା ଅସମ୍ଭବ। ବିରୋଧୀ ଦଳ ନେତାମାନେ ତୁଷ୍ଟୀକରଣ ରାଜନୀତି କରୁଛନ୍ତି ବୋଲି ସେ ଅଭିଯୋଗ କରିଛନ୍ତି। ଏହାକୁ କାର୍ଯ୍ୟକାରୀ କରିବାକୁ ମନା କରିବାର ଅଧିକାର ସେମାନଙ୍କର ଅଛି କି ବୋଲି ଶାହା ବିରୋଧୀଙ୍କୁ ପ୍ରଶ୍ନ କରିଛନ୍ତି। ସେମାନେ ମଧ୍ୟ ବୁଝନ୍ତି ଯେ ସେମାନଙ୍କର ଅଧିକାର ନାହିଁ। ଆମ ସମ୍ବିଧାନରେ ନାଗରିକତା ସଂକ୍ରାନ୍ତ ଆଇନ ପ୍ରଣୟନ କରିବାର କ୍ଷମତା କେବଳ ସଂସଦକୁ ଦିଆଯାଇଛି। ଏହା ଏକ କେନ୍ଦ୍ରୀୟ ବିଷୟ, ରାଜ୍ୟ ବିଷୟ ନୁହେଁ।
