ବିଭ୍ରାନ୍ତିକର ଖବରକୁ ନେଇ ବସିଲା ହାଇକୋର୍ଟଙ୍କ ଫୁଲ୍ ବେଞ୍ଚ, ନିର୍ଦ୍ଦିଷ୍ଟ ଗଣମାଧ୍ୟମକୁ କଲେ ନିନ୍ଦା

ଭୁବନେଶ୍ୱର: ପଦାରେ ପଡିଲା ହୀନ ଚକ୍ରାନ୍ତ। ହାଇକୋର୍ଟଙ୍କ ମୁଖ୍ୟ ବିଚାରପତିଙ୍କ ବିରୋଧରେ ଷଡଯନ୍ତ୍ରର ପର୍ଦ୍ଦାଫାସ । ଖାଲି ଏତିକି ନୁହେଁ ବିଭ୍ରାନ୍ତିକର ଖବର ପ୍ରସାରଣକୁ ନେଇ ଆଜି ମୁଖ୍ୟ ବିଚାରପତିଙ୍କ ଅଧ୍ୟକ୍ଷତାରେ ବସିଥିଲା ଜରୁରୀ ବୈଠକ । ବୈଠକରେ ନିର୍ଦ୍ଦିଷ୍ଟ ଗଣମାଧ୍ୟମକୁ ମଧ୍ୟ ନିନ୍ଦା କରିଛନ୍ତି କୋର୍ଟ ।

ସୂଚନା ଅନୁଯାୟୀ, ବିଭ୍ରାନ୍ତିକର ଖବର ପ୍ରସାରଣକୁ ନେଇ ଆଜି ବସିଛି ହାଇକୋର୍ଟଙ୍କ ଫୁଲ୍ ବେଞ୍ଚ । ଯେଉଁଥିରେ ନିର୍ଦ୍ଦିଷ୍ଟ ଗଣମାଧ୍ୟମକୁ ଖୁବ୍ ନିନ୍ଦା କରାଯାଇଛି। ହାଇକୋର୍ଟଙ୍କ ମୁଖ୍ୟ ବିଚାରପତିଙ୍କ ଅଧ୍ୟକ୍ଷତାରେ ବସିଥିଲା ଏହି ଜରୁରୀ ବୈଠକ।

ଉଲ୍ଲେଖଯୋଗ୍ୟ ଜନକଲ୍ୟାଣକାରୀ କାର୍ଯ୍ୟକ୍ରମର ଫଟୋକୁ ନେଇ ଭିନ୍ନ ଢଙ୍ଗରେ ପ୍ରସାରଣ କରିଥିଲା ଏକ ନିର୍ଦ୍ଦିଷ୍ଟ ଗଣମାଧ୍ୟମ । ଆଉ ଯେଉଁ ଫଟୋରେ ସୁପ୍ରିମକୋର୍ଟର ଜଣେ ବିଚାରପତିଙ୍କ ସହ ରହିଛନ୍ତି ହାଇକୋର୍ଟର ମୁଖ୍ୟ ବିଚାରପତି ଓ ଫାଇଭ-ଟି ସଚିବ । କିନ୍ତୁ ଉକ୍ତ ଫଟୋଟି ହେଉଛି ୨୦୨୦ ମାର୍ଚ୍ଚ ୧୨ତାରିଖର । ଏହି ଫଟୋ ଭୁବନେଶ୍ବରରେ ଥିବା ସତ୍ୟସାଇ ସେବା ଅନୁଷ୍ଠାନରେ ଆୟୋଜିତ ଏକ ତିନି ଦିନିଆ ହାର୍ଟ କ୍ୟାମ୍ପ ଅବସରରେ ଉଠାଯାଇଥିଲା । ଏହି ଫଟୋରେ ସତ୍ୟସାଇ ହାର୍ଟ ହସ୍ପିଟାଲର ମ୍ୟାନେଜିଂ ଟ୍ରଷ୍ଟି ମନୋଜ ଭିମାନ, ହାଇକୋର୍ଟ ମୁଖ୍ୟ ବିଚାରପତି ଓ ଫାଇଭ-ଟି ସଚିବଙ୍କ ସହ ହାର୍ଟ ହସ୍ପିଟାଲର ତିନିଜଣ ଡାକ୍ତର ମଧ୍ୟ ଉପସ୍ଥିତ ଥିଲେ। ଏହା କୌଣସି ରୁଦ୍ଧଦ୍ବାର ବୈଠକ ନୁହେଁ, ବରଂ ଏହା ଥିଲା ଏକ ସାଧାରଣ ସଭା । ଏହି ଫଟୋକୁ ନେଇ ହାଇକୋର୍ଟର ଜଣେ ଆଇନଜୀବୀ ଓ ନିର୍ଦ୍ଦିଷ୍ଟ ଏକ ଗଣମାଧ୍ୟମ ବିଭ୍ରାନ୍ତିକର ଖବର ପରିବେଷଣ କରିଥିଲେ ।