ନୂଆଦିଲ୍ଲୀ: ଦିଲ୍ଲୀ ନିର୍ବାଚନ ଲାଗି କଂଗ୍ରେସର ବଡ଼ ଘୋଷଣା। ଶିକ୍ଷିତ ଯୁବକଙ୍କ ଲାଗି ଘୋଷିତ ହୋଇଛି ଯୁବା ଉଡ଼ାନ ଯୋଜନା। ଏହି ଯୋଜନାରେ ଶିକ୍ଷିତ ବେକାର ଯୁବକଙ୍କୁ ମିଳିବ ମାସିକ ୮ ହଜାର ୫୦୦ ଟଙ୍କା। ବର୍ଷକ ଲାଗି ଏହି ସହାୟତା ମିଳିବ। ଏଆଇସିସି ସାଧାରଣ ସମ୍ପାଦକ ସଚିନ ପାଇଲଟ ଏହି ଯୋଜନା ନେଇ ଘୋଷଣା କରିଛନ୍ତି। ସାମ୍ବାଦିକ ସମ୍ମିଳନୀରେ ସଚିନ କହିଛନ୍ତି- କୌଣସି କମ୍ପାନୀ, କାରଖାନା ବା ସଂଗଠନରେ ଯେଉଁ ଯୁବକମାନେ ନିଜର ପାରଦର୍ଶିତା ପ୍ରଦର୍ଶନ କରିପାରିବେ ସେମାନଙ୍କୁ ସହାୟତା ଦିଆଯିବ। ଫଳରେ ସେମାନେ ଦକ୍ଷତା କ୍ଷେତ୍ରରେ ଅଧିକ ବିକଶିତ ହୋଇପାରିବେ। ଗତ ଜାନୁଆରୀ ୬ରେ କଂଗ୍ରେସ ପ୍ୟାରି ଦିଦି ଯୋଜନା ଘୋଷଣା କରିଥିଲା। ଏହି ଯୋଜନାରେ ମହିଳାଙ୍କୁ ମାସିକ ୨, ୫୦୦ ଟଙ୍କାର ସହାୟତା ଘୋଷଣା କରାଯାଇଥିଲା। ଜାନୁଆରୀ ୮ରେ ଦଳ ଘୋଷଣା କରିଥିଲା ଜୀବନ ରକ୍ଷା ଯୋଜନା। ଏଥିରେ ପ୍ରାୟ ୨୫ ଲକ୍ଷ ଟଙ୍କାର ମଗାଣା ସ୍ବାସ୍ଥ୍ୟ ବୀମା ବ୍ୟବସ୍ଥା ରହିଥିଲା।
