ନନ୍ଦିଘୋଷ ବ୍ୟୁରୋ: ଟଳିବ କି ମଧ୍ୟପ୍ରାଚ୍ୟ ସଙ୍କଟ । ଇସ୍ରାଏଲ-ଇରାନ ବିବାଦକୁ ନେଇ ସୃଷ୍ଟି ହେଲାଣି ତୃତୀୟ ବିଶ୍ବଯୁଦ୍ଧ ସ୍ଥିତି । ସଙ୍କଟ ଟାଳିବାକୁ ଜାତିସଂଘ ନିରାପତ୍ତା ପରିଷଦ ଡାକିଛି ଜରୁରୀ ବୈଠକ । ତେଣେ ଆଜି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିବେ ଇରାନ ବୈଦେଶିକ ମନ୍ତ୍ରୀ ଆବାସ ଆରାଗାଚି । ଦୁଇ ନେତାଙ୍କ ମଧ୍ୟରେ କେତେକ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା ହେବାର କାର୍ଯ୍ୟକ୍ରମ ରହିଛି । ଇରାନର ୩ଟି ଆଣବିକ କେନ୍ଦ୍ର ଉପରେ ଆମେରିକାର ହମଲାକୁ ନେଇ ତେଜିଛି ସୁପରପାୱାରଙ୍କ ମଧ୍ୟରେ ବିବାଦ। ଆମେରିକାର ଅପରେସନ ହାମରରେ ଇରାନର ଫୋର୍ଡୋ, ନଟାଞ୍ଜ ଓ ଏସଫାହନ ଆଣବିକ ସ୍ଥଳ ଧ୍ବଂସ ହୋଇଥିଲେ ବି ଆଣବିକ କାର୍ଯ୍ୟକ୍ରମ ବାତିଲ ହେବ ନାହିଁ ବୋଲି କହିଛି ଇରାନ।
ତେଣେ ଆମେରିକାର ଏହି ଆକ୍ରମଣ ସଫଳ ହୋଇଛି ବୋଲି କହିଛନ୍ତି ଆମେରିକା ପ୍ରତିରକ୍ଷା ସଚିବ ପିଟ୍ ହେଗସେଥ। ସେପଟେ ଇରାନକୁ ଆଣବିକ ଯୁଦ୍ଧାସ୍ତ୍ର ଦେବାକୁ ବହୁରାଷ୍ଟ୍ର ପ୍ରସ୍ତୁତ ଅଛନ୍ତି ବୋଲି କହିଛନ୍ତି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଘନିଷ୍ଠ ସହଯୋଗୀ ଦିମିତ୍ରି ମେଦଭେଦେବ। ଆଲୋଚନା ଜରିଆରେ ବିବାଦର ସମାଧାନ ଲାଗି ଫ୍ରାନ୍ସ, ୟୁରୋପୀୟ କମିଶନ, ୟୁରୋପିଆନ କାଉନସିଲ, ଭାରତ ପ୍ରଭୃତି ରାଷ୍ଟ୍ର ଆହ୍ବାନ ଦେଇଛନ୍ତି। ଗତକାଲି ମଧ୍ୟପ୍ରାଚ୍ୟ ସଙ୍କଟ ଟାଳିବା ଲାଗି ଇରାନ ରାଷ୍ଟ୍ରପତି ମାସୁଦ ପେସ୍କିଆନଙ୍କ ସହ କଥା ହୋଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।
