ଷ୍ଟ୍ରବେରୀ ଚାଷ କରି ଲକ୍ଷଲକ୍ଷ ରୋଜଗାର କରୁଛନ୍ତି ଚାଷୀ

ଉମରକୋଟ : ସବୁଜ କ୍ଷେତରେ ରଙ୍ଗୀନ ଲିଚୁ ଲାଇଟ୍ ଭଳି ଚମକୁଚି ଷ୍ଟ୍ରବେରୀ ।  ଆଉ ପାଚିଲା ଫଳକୁ ମହିଳାମାନେ ଗୋଟି ଗୋଟି କରି ତୋଳୁଛନ୍ତି । ଯତ୍ନର ସହ ତୋଳିବା ସହ ପ୍ୟାକେଟରେ ଭର୍ତ୍ତି କରି ପାଖ ବଜାରକୁ ବିକ୍ରି ପାଇଁ ପଠାଯାଉଛି । ଏହା କୌଣସି ବାହାର ରାଜ୍ୟର ଦୃଶ୍ୟ ନୁହେଁ । ଆମ ରାଜ୍ୟର ନବରଙ୍ଗପୁର ଜିଲ୍ଲାର ଉମରକୋଟ ଓ ରାଇଘର ଭଳି ଉପାନ୍ତ ଅଞ୍ଚଳରେ ହେଉଛି ଅର୍ଥକାରୀ ଷ୍ଟ୍ରବେରୀ ଚାଷ । ଉମରକୋଟର ବଡ଼ କୁମାରୀର ଚାଷୀ ଜ୍ୟୋତିର୍ମୟ ସର୍ଦ୍ଦାର ତାଙ୍କ ୫୦ ଡିସିମିଲ ଜମିରେ ପ୍ରଥମ ଥର ପାଇଁ ଷ୍ଟ୍ରବେରୀ ଚାଷ କରିଛନ୍ତି । ବର୍ତ୍ତମାନ ସେ ଦିନକୁ ୫୦ରୁ ୬୦ କିଲୋ ଷ୍ଟ୍ରବେରୀ ଉତ୍ପାଦନ କରି ପାଖ ବଜାରରେ ବିକ୍ରି କରୁଛନ୍ତି । ମାତ୍ର ୩୦ ହଜାର ଟଙ୍କା ବ୍ୟୟ କରି ଏବେ ସେ ଲକ୍ଷାଧିକ ଟଙ୍କା ଉପାର୍ଜନ କରିପାରୁଛନ୍ତି । ସେହିପରି ରାଇଘର ଛତାବେଡ଼ା ଗାଁର ରଞ୍ଜିତ ମିସ୍ତ୍ରୀ ମଧ୍ୟ ନିଜ ୫୦ ଡିସିମିଲ ଜମିରେ ଷ୍ଟ୍ରବେରୀ ଚାଷ କରି ବଜାରରେ ବିକ୍ରି ଆରମ୍ଭ କରିଛନ୍ତି । ସେପଟେ ଜ୍ୟୋତିର୍ମୟ ଚାଷ କରିବା ସହିତ ଚାଷ କାର୍ଯ୍ୟରେ ନିୟୋଜିତ କରି ଲୋକଙ୍କୁ ରୋଜଗାରକ୍ଷମ କରାଇଛନ୍ତି ।

ଦିନକୁ ଦିନ ପାରମ୍ପରିକ ଚାଷ ବଦଳରେ ନୂଆ ନୂଆ ଚାଷ କରିବାକୁ ଆଗ୍ରହ ପ୍ରକାଶ କରୁଛନ୍ତି ଚାଷୀ । ଅର୍ଥକାରୀ ଫସଲ ଷ୍ଟ୍ରବେରୀ ଚାଷ ଭଲ ହେଉଥିବାରୁ ଏବେ ଓଡ଼ିଶାରେ ଧିରେ ଧିରେ ବୃଦ୍ଧି ପାଇବାରେ ଲାଗିଛି । ବାହାର ଷ୍ଟ୍ରବେରୀ ଅପେକ୍ଷା ସ୍ଥାନୀୟ ଷ୍ଟ୍ରବେରୀର ସ୍ଵାଦ ଅଧିକ । ଏହାର ଦର କମ୍ ଥିବାରୁ ଏହି ଷ୍ଟ୍ରବେରୀକୁ ବେଶ୍ ପସନ୍ଦ କରୁଛନ୍ତି ଗ୍ରାହକ । ଉମରକୋଟ ଷ୍ଟ୍ରବେରୀ ର ଚାହିଦା ଧୀରେ ଧୀରେ ବଢ଼ିବାରେ ଲାଗିଛି । ପାହାଡ଼ିଆ ମାଟିରେ ଉଦ୍ୟାନ କୃଷି ବିଭାଗ ସହଯୋଗରେ ଷ୍ଟ୍ରବେରୀ ଚାଷ ହେଉଛି । ଉଦ୍ୟାନ କୃଷି ବିଭାଗ ତରଫରୁ ମାଗଣାରେ ଚରା ଯୋଗାଇ ଦିଆଯାଉଛି । ଉମରକୋଟ ଓ ରାଇଘରରେ ୬ ଜଣ ଚାଷୀଙ୍କୁ ଚାରା ଦିଆଯାଇଛି । ଷ୍ଟ୍ରବେରୀ ଚାଷ କରି ଚାଷୀମାନେ ନୂଆ ଚାଷର କୌଶଳ ଜାଣି ପାରିବା ସହ ସେମାନଙ୍କ ଆର୍ଥିକ ଅବସ୍ଥା ସ୍ୱଚ୍ଛଳ ହେବ ବୋଲି କହିଛନ୍ତି ଉଦ୍ୟାନ କୃଷି ଅଧିକାରୀ । ଥିବା କହିଛନ୍ତି ଉଦ୍ୟାନ କୃଷି ଅଧିକାରୀ। ଏବେ ଆଦିବାସୀ ଅଧୁଷିତ ଅଞ୍ଚଳରେ ଫଳୁଛି ବିଦେଶୀ ଫଳ । ଉଦ୍ୟାନ କୃଷି ବିଭାଗ ପକ୍ଷରୁ ଷ୍ଟ୍ରବେରୀ ଚାଷ ପାଇଁ ମାଗମା ଚାରା ସହିତ ସମସ୍ତ ସୁବିଧା ଯୋଗାଇ ଦିଆଯାଉଥିବାରୁ ଏବେ ଏହି ଚାଷ କରି ଲାଭବାନ ହେଉଛନ୍ତି ଚାଷୀ ।