ବଢ଼ିବ ୟୁକ୍ରେନ ବଳ, ପୋଲାଣ୍ଡ ଯୋଗାଇବ ମିଗ୍-୨୯ ଲଢୁଆ ବିମାନ

ନୂଆଦିଲ୍ଲୀ: ନାଟୋରେ ଫିନଲାଣ୍ଡ ସାମିଲ ହେବା ପରେ ଏବେ ୟୁକ୍ରେନକୁ ନେଇ ବଢିଛି ଟେନସନ । ୟୁକ୍ରେନକୁ ପୋଲାଣ୍ଡ ୧୪ଟି ମିଗ୍-୨୯ ଲଢୁଆ ବିମାନ ଯୋଗାଇବାକୁ ଘୋଷଣା କରିଛି । ଏହାକୁ ନେଇ ପୋଲାଣ୍ଡକୁ ଧନ୍ୟବାଦ ଜଣାଇଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ସେପଟେ ଯୁଦ୍ଧ ପ୍ରସଙ୍ଗରେ ଅଧିକ ଉତ୍ତେଜନା ସୃଷ୍ଟି କରାଯାଉଥିବାକୁ ନେଇ ଆମେରିକା ଓ ୟୁରୋପୀୟ ୟୁନିଅନକୁ ଦୋଷ ଦେଇଛନ୍ତି ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ । ପୋଲାଣ୍ଡ ଗସ୍ତରେ ଯାଇ ସେ ପୋଲାଣ୍ଡ ରାଷ୍ଟ୍ରପତି ଆନ୍ଦ୍ରେଜ ଡୁଡାଙ୍କୁ ସାକ୍ଷାତ କରିବା ସହ ସମର୍ଥନ ଯୋଗାଡ଼ କରିଛନ୍ତି । ସେଠାରେ ପୋଲାଣ୍ଡ ଫାଷ୍ଟଲେଡି ଆଗାଟା କର୍ଣ୍ଣହସରଙ୍କୁ ବି ସାକ୍ଷାତ କରିଥିଲେ ୟୁକ୍ରେନ ଫାଷ୍ଟଲେଡି ଓଲେନା ଜେଲେନସ୍କା ।

ଯୁଦ୍ଧ ଆରମ୍ଭ ପରଠାରୁ ୟୁକ୍ରେନକୁ ପୋଲାଣ୍ଡ ସମର୍ଥନ ଜଣାଇ ଆସୁଥିବାବେଳେ ଯୁଦ୍ଧ ବିମାନ ଯୋଗାଇବା ଲାଗି ଘୋଷଣା କରିଛି । ସହଯୋଗ ପ୍ରସଙ୍ଗରେ ଜେଲେନସ୍କି କହିଛନ୍ତି- ୟୁକ୍ରେନକୁ ସର୍ବଦା ପୋଲାଣ୍ଡ ସହାୟତାର ହାତ ବଢାଇଛି ଏବଂ ୟୁକ୍ରେନକୁ ପାଶ୍ଚାତ୍ୟ ରାଷ୍ଟ୍ରଙ୍କ ସହଯୋଗ କ୍ଷେତ୍ରରେ ପୋଲାଣ୍ଡ ପ୍ରମୁଖ ଭୂମିକା ଗ୍ରହଣ କରୁଛି । ସେପଟେ ଦୋନେସ୍କରେ ଗୋଳା ଆକ୍ରମଣରେ ୩ ଜଣ ପ୍ରାଣ ହରାଇଛନ୍ତି । ଏହା ସହ ଜାପୋରିଜିୟା ଆଣବିକ ପ୍ଲାଣ୍ଟ ନିକଟରେ ୟୁକ୍ରେନର ଏକ ଡ୍ରୋନ କ୍ରାସ ହୋଇଥିବା ସୂଚନା ମିଳିଛି ।