ମହାରାଷ୍ଟ୍ରରେ ଶିବସେନା-କଂଗ୍ରେସ ଆଲୋଚନା ଜାରି, କଥାବାର୍ତ୍ତା ପାଇଁ କମିଟି ଗଠନ କଲା ଏନସିପି

ମୁମ୍ବାଇ: ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଲାଗୁ ପରେ ବି ସରକାର ଗଢ଼ିବା ଆଶା ଛାଡ଼ିନି ଶିବସେନା । ମୁମ୍ବାଇର ଟ୍ରାଇଡେଣ୍ଟ ହୋଟେଲରେ କଂଗ୍ରେସ କମିଟି ନେତାଙ୍କୁ ଉଦ୍ଧବ ଠାକ୍‌ରେ ଭେଟିଛନ୍ତି । ସର୍ବନିମ୍ନ ଦାବି ନେଇ ସେନା-କଂଗ୍ରେସ ମଧ୍ୟରେ ଆଲୋଚନା ଚାଲିଛି । ସେପଟେ ସେନାର ସଙ୍କଟମୋଚକ ସଞ୍ଜୟ ରାୱତ ୨ ଦିନ ପରେ ଲୀଳାବତି ହସ୍ପିଟାଲରୁ ଡିସ୍‌ଚାର୍ଜ ହୋଇଛନ୍ତି । ମେଡିକାଲରୁ ଫେରିବା ପରେ ଶିବସେନାରୁ ହିଁ ମୁଖ୍ୟମନ୍ତ୍ରୀ ହେବେ ବୋଲି ସଞ୍ଜୟ ପୁଣିଥରେ ଦୋହରାଇଛନ୍ତି ।

ଆଜି ସକାଳେ ମେଡିକାଲରେ ଭର୍ତ୍ତି ହୋଇଥିବା ସଞ୍ଜୟ ରାୱତଙ୍କୁ କଂଗ୍ରେସ ନେତା ଭେଟିଥିଲେ । ଲୀଳାବତି ହସ୍ପିଟାଲରେ ସଞ୍ଜୟଙ୍କୁ ଭେଟି କଂଗ୍ରେସ ନେତା ଅଶୋକ ଚୌହାନ, ବାଲାସାହେବ ଥୋରାଟ, ମାନିକରାଓ ଠାକରେ ପ୍ରମୁଖ ସ୍ୱାସ୍ଥ୍ୟାବସ୍ଥା ପଚାରି ବୁଝିଥିଲେ ।

ରାଜନୈତିକ ହଲଚଲ ଲାଗି ରହିଥିବା ବେଳେ ସପ୍ତାହେ ହେଲାଣି ଜୟପୁର ରିସୋର୍ଟରେ ନଜରବନ୍ଦୀ ଥିବା କଂଗ୍ରେସର ସମସ୍ତ ୪୪ ବିଧାୟକ ଆଜି ମୁମ୍ବାଇ ଫେରିଛନ୍ତି । କିଛି ବିଧାୟକଙ୍କ ମତ ବିଜେପିକୁ କ୍ଷମତାରୁ ଦୂରେଇ ରଖିବାକୁ ସେମାନେ କାହା ହାତ ବି ଧରିପାରିବେ ।

ସେପଟେ ବୈଠକ ପରେ ଏନସିପି ୫ରୁ ୬ ଜଣ ନେତାଙ୍କୁ ନେଇ ଏକ କମିଟି ଗଠନ କରିଛି । ଏହି କମିଟି ଆଗାମୀ ରଣନୀତି ଉପରେ କାମ କରିବ । ଶିବସେନା ସହ କମିଟି ଆଲୋଚନା କରିବା ସହ ସରକାର ଗଠନ ନେଇ ପଦକ୍ଷେପ ନେବ ବୋଲି ଏନସିପି ନେତା ଅଜିତ୍ ପାୱାର କହିଛନ୍ତି । କେବେ ତିନି ଦଳଙ୍କ ମଧ୍ୟରେ ସହମତି ଧିରେ ଧିରେ ବୃଦ୍ଧି ପାଉଥିବା ବେଳେ ମାମଲା ସୁପ୍ରିମକୋର୍ଟରେ ପହଞ୍ଚିଛି । ')}