ଲକ୍ଷାଧିକ ଟଙ୍କାର ସୁନା ଅଳଙ୍କାର ଚୋରି, ଘରେ କେହି ନ ଥିବା ବେଳେ ଲୁଟିନେଲେ ଦୁର୍ବୃତ୍ତ

ଉଦଳା : ଘରେ ପଶି ଚୋରି । ଚୋରମାନେ ଏତେ ଚାଲାକ ଯେ, ଅସଲି ସୁନାର ଗହଣା ନେଇ ଚମ୍ପଟ ମାରିଥିବା ବେଳେ ଯାହା ଇମିଟେସନ ଥିଲା, ତାକୁ ନେଇ ନାହାନ୍ତି। ମୟୂରଭଂଜ ଜିଲ୍ଲା ଉଦଳା ବୃନ୍ଦାଗଡ଼ି ଗାଁରେ ଲକ୍ଷାଧିକ ଟଙ୍କାର ସୁନା ଅଳଙ୍କାର ଓ ନଗଦ ଟଙ୍କା ଚୋରି ହୋଇଛି। ଗାଁର ସୁଦାମ କୁମାର ମାଝୀ ଗତକାଲି ସନ୍ଧ୍ୟାରେ ଘରେ ତାଲା ପକାଇ କୌଣସି କାମରେ ବାହାରକୁ ଯାଇଥିଲେ। ରାତିରେ ପରିବାର ଲୋକେ ଫେରିବା ପରେ ଦେଖିଥିଲେ, ଘରର ମୁଖ୍ୟ କବାଟର ତାଲା ଭଙ୍ଗା ଯାଇଛି। ଆଲମିରା ଭଙ୍ଗା ହୋଇଛି। ଆଲମିରାରେ ଥିବା ସୁନା ଅଳଙ୍କାର ଓ ୪୫ ହଜାର ଟଙ୍କା ମଧ୍ୟ ନାହିଁ। ଚୋରମାନେ କେବଳ ସୁନା ଜିନିଷ ନେଇଥିବା ବେଳେ ଇମିଟେସନ ଅଳଙ୍କାରକୁ ଛାଡି ଯାଇଛନ୍ତି। ପୋଲିସ ସାଇଣ୍ଟିଫିକ ଟିମ ସହାୟତାରେ ତଦନ୍ତ କରୁଛି।