ମାଲକାନଗିରି ଜଙ୍ଗଲ ଉପରେ ଉଡ଼ି ମାଓବାଦୀଙ୍କ ଠିକଣା ଖୋଜୁଛି UAV
1 min read
ମାଲକାନଗିରି: ମାଓବାଦୀଙ୍କୁ ଖୋଜିବାକୁ ଆକାଶ ମାର୍ଗରେ ଉଡିଲା UAV (ଅନମେନଡ ଏରିଏଲ ଭେଇକିଲ୍) । ମାଲକାନଗିରି ଜିଲ୍ଲା ମେଟାଗୁଡା ଓ କାଟାନପାଲି ଜଙ୍ଗଲ ମଧ୍ୟରେ ଉଡିଛି ଏହି ଡୋନ୍ । ଏହାଦ୍ୱାରା ଲୁଚିଥିବା ମାଓବାଦୀଙ୍କୁ ସହଜରେ ଚିହ୍ନଟ କରିହେବ ।
UAV ୧୫ କିମି ପର୍ଯ୍ୟନ୍ତ ଉଡି ମାଓବାଦୀଙ୍କ ଠିକଣା ଖୋଜିବାରେ ସହାୟକ ହୋଇପାରିବ । ଏବେ ପର୍ଯ୍ୟନ୍ତ ମେଟାଗୁଡା ଓ କାଟାନପାଲି ଜଙ୍ଗଲ ମଧ୍ୟରେ ମାଓବାଦୀ ଲୁଚି ରହିଥିବା ସୂଚନା ରହିଛି l କୁମ୍ବିଂ ଅପରେସନକୁ କଡାକଡି କରାଯାଇଛି । ଆଜି ମାଲକାନଗିରି ଜିଲ୍ଲାରେ ମାଓବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା । ସୁରକ୍ଷାକର୍ମୀଙ୍କ ଗୁଳିରେ ଜଣେ ମାଓବାଦୀର ମୃତ୍ୟୁ ଘଟିଛି । ମାଓବାଦୀଙ୍କ ଗୁଳିରେ ଜଣେ ଡିଭିଏଫ ଯବାନ ଆହତ ହୋଇଛନ୍ତି । ଆହତ ଯବାନଙ୍କୁ ମାଲକାନଗିରି ମେଡିକାଲରୁ ବାୟୁସେନା ବିମାନ ଯୋଗେ ବିଶାଖାପାଟଣାକୁ ଏୟାର ଲିଫ୍ଟ କରାଯାଇଛି । ଏମଭି-୭୯ ଥାନା ଜିନେଲଗୁଡା ଗାଁ ନିକଟସ୍ଥ ଜଙ୍ଗଲରେ ଗୁଳି ବିନିମୟ ହୋଇଥିଲା ।
ଛତିଶଗଡରୁ କିଛି ମାଓବାଦୀ ଆସି ଲୁଚି ରହିଥିବା ନେଇ ସୂଚନା ମିଳିଥିଲା । ଏହାପରେ ଏସଓଜି ଓ ଡିଭିଏଫ ବାହିନୀ ତରଫରୁ ସେଠାରେ କମ୍ବିଂ ଅପରେସନ ଆରମ୍ଭ ହୋଇଥିଲା । ଭୋର ସମୟରେ ଯବାନମାନେ ନକ୍ସଲ ଶିବିର ପାଖରେ ପହଞ୍ଚିବା ବେଳେ ନକ୍ସଲ ଗୁଳି ମାଡ଼ କରିଥିଲେ । ଯାହାର ପାଲଟା ଜବାବ ଦେଇଥିଲେ ଯବାନ ।
