ଋଷ ବିରୋଧରେ ରକ୍ତମୁଖା ବାଇଡେନ, ୟୁକ୍ରେନକୁ ଦେବ ୬୦୦ ନିୟୁତ ଡାଲରର ଭୟଙ୍କର ମାରଣାସ୍ତ୍ର

ଓ୍ୱାଶିଂଟନ: ଋଷ ବିରୋଧରେ ରକ୍ତମୁଖା ଆମେରିକା ରାଷ୍ଟ୍ରପତି ଜୋ ବାଇଡେନ । ଋଷ ସୈନ୍ୟଙ୍କ ମୁକାବିଲା ଲାଗି ୟୁକ୍ରେନକୁ ଆମେରିକା ଯୋଗାଇବ ୬୦୦ ନିୟୁତ ଡଲାର ମୂଲ୍ୟର ଭୟଙ୍କର ମାରଣାସ୍ତ୍ର । ଏନେଇ ସୂଚନା ଦେଇଛନ୍ତି ଆମେରିକା ପ୍ରତିନିଧି ସଭାର ସ୍ପିକର ନାନସି ପେଲୋସି । ଏହା ସହ ୟୁକ୍ରେନକୁ ସମସ୍ତ ପ୍ରକାର ମାନବିକ ସହାୟତା ଯୋଗାଇବାକୁ ସେ ଘୋଷଣା କରିଛନ୍ତି । ଅତ୍ୟାଧୁନିକ ଓ ଅତି ଭୟଙ୍କର ଏହି ମାରଣାସ୍ତ୍ର ପ୍ରଥମ ଥର ଲାଗି ପ୍ରୟୋଗ ହେବ ବୋଲି ସୂଚନା ମିଳିଛି ।

ଆମେରିକାରେ ଥିବା ଋଷର ସମସ୍ତ ସମ୍ପତ୍ତିକୁ ବାଜ୍ୟାପ୍ତି କରାଯିବ ବୋଲି ବାଇଡେନ ଘୋଷଣା କରିଛନ୍ତି । ଏହା ସହ ଗ୍ରୁପ-୭ ରାଷ୍ଟ୍ର ମଧ୍ୟ ଋଷ ବିରୋଧରେ କଡ଼ା କଟକଣା ଜାରି କରିବେ ବୋଲି କହିଛନ୍ତି ବାଇଡେନ । ରାଷ୍ଟ୍ର ଉଦ୍ଦେଶ୍ୟରେ ଭାଷଣ ଦେଇ ବାଇଡେନ କହିଛନ୍ତି- ୟୁକ୍ରେନ ଉପରେ ଋଷର ଆକ୍ରମଣକୁ ବରଦାସ୍ତ କରାଯିବ ନାହିଁ । ବାଇଡେନଙ୍କ ଏହି ଘୋଷଣା ପରେ ଆମେରିକାସ୍ଥିତ ଋଷର ୪ଟି ବିଶାଳ ବ୍ୟାଙ୍କର ସମ୍ପତ୍ତିକୁ ବାଜ୍ୟାପ୍ତି କରାଯିବା ସହ ସମସ୍ତ କାରବାର ଉପରେ ନିଷେଧାଦେଶ ପ୍ରକ୍ରିୟା ଆରମ୍ଭ ହୋଇଛି ।

ସେପଟେ ଯୁଦ୍ଧ ସ୍ଥିତି ନେଇ ଭାରତ ସହ ଆଲୋଚନା ଜାରି ରହିଛି ବୋଲି କହିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ । ବାଇଡେନ କହିଛନ୍ତି ୟୁକ୍ରେନ ସଂକଟ ପରିପ୍ରେକ୍ଷୀରେ ଭାରତର ଭୂମିକାକୁ ଆମେରିକା ଗୁରୁତ୍ୱ ଦେଉଛି । ଏନେଇ ଆଲୋଚନା ଜାରି ରହିଛି ବୋଲି କହିଛନ୍ତି ।