ଟମାଟୋ ପାଇଁ ସମ୍ପର୍କରେ ଫାଟ ; ରାଗିକି ଛୁଆକୁ ନେଇ ଘର ଛାଡି ପଳାଇଲା ସ୍ତ୍ରୀ

ଭୋପାଲ :  ରକେଟ୍‌ ଭଳି ଟମାଟୋର ଆକାଶଛୁଆଁ ଦରବୃଦ୍ଧି ପାରିବାରିକ ସମ୍ପର୍କରେ ମଧ୍ୟ ଫାଟ ସୃଷ୍ଟି କରିଛି । ସ୍ବାମୀଙ୍କୁ ଛାଡ଼ି ପିଲାଙ୍କୁ ନେଇ ଘର ଛାଡ଼ି ପାଳାଇଲେ ସ୍ତ୍ରୀ । ଶେଷରେ ପୋଲିସ ବୁଝାସୁଝା କରିବା ପରେ ଓ ସ୍ବାମୀ ଅଧକିଲୋ ଟମାଟୋ ଉପହାର ଦେବା ପରେ ସ୍ତ୍ରୀ ଘରକୁ ଫେରିଛନ୍ତି । ମଧ୍ୟପ୍ରଦେଶରେ ଏଭଳି ଘଟଣା ଘଟିଛି ।

ମଧ୍ୟପ୍ରଦେଶର ସାହୋଲ ଜିଲ୍ଲାରେ ସଞ୍ଜୀବ ବର୍ମା ଓ ତାଙ୍କ ସ୍ତ୍ରୀ ଆରତି ଏକ ଢାବା ଚଳାନ୍ତି । ତେବେ ସ୍ତ୍ରୀଙ୍କୁ ନପଚାରି ତରକାରୀରେ ସଞ୍ଜୀବ ଦୁଇଟି ଟମୋଟୋ ପକାଇ ଦେଇଥିଲେ । ଏଇ କଥାକୁ ନେଇ ସ୍ବାମୀ- ସ୍ତ୍ରୀଙ୍କ ମଧ୍ୟରେ ପ୍ରବଳ ଝଗଡ଼ା ହୋଇଥିଲା । ସ୍ତ୍ରୀ ଆରତି ତାଙ୍କ ଝିଅକୁ ନେଇ ଘର ଛାଡ଼ି ଭଉଣୀ ଘରକୁ ପଳାଇଥିଲେ ।

ଏନେଇ ସଞ୍ଜୀବ ଧାନପୁରୀ ଥାନାରେ ଏତଲା ଦେବା ପରେ ପୋଲିସ ସ୍ତ୍ରୀଙ୍କୁ ଭଉଣୀ ଠାବ କରି ଥାନାକୁ ଆଣିଥିଲା । ଥାନାରେ ଉଭୟଙ୍କ ମଧ୍ୟରେ ବୁଝାମଣା ହୋଇଛି । ସ୍ତ୍ରୀ ଆରତିଙ୍କୁ ସ୍ବାମୀ ସଞ୍ଜୀବ ଅଧକିଲୋ ଟମାଟୋ ଉପହାର ଦେଇଛନ୍ତି । ଛୋଟବଡ଼ କଥାକୁ ନେଇ ଆଉ ସ୍ବାମୀ- ସ୍ତ୍ରୀ ଝଗଡ଼ା କରିବେ ନାହିଁ କି ସ୍ତ୍ରୀଙ୍କୁ ନପଚାରି ତରକାରୀରେ ଟମାଟୋ ପକାଇବେ ନାହିଁ ବୋଲି ସଂଜୀବ କହିଛନ୍ତି ।