ଫିଟୁନି ଦୁଇ ରୁଷୀୟ ପର୍ଯ୍ୟଟକଙ୍କ ମୃତ୍ୟୁ ରହସ୍ୟ, ମୁହଁ ଖୋଲୁନାହାନ୍ତି ଗାଇଡ କି ସାଥୀ ପର୍ଯ୍ୟଟକ

ରାୟଗଡ଼ା : ରହସ୍ୟ ଘେରରେ ଦୁଇ ରୁଷୀୟ ପର୍ଯ୍ୟଟକଙ୍କ ମୃତ୍ୟୁ ରହିଥିବା ବେଳେ ସେମାନଙ୍କ ସହ ଆସିଥିବା ଆଉ ଦୁଇ ଜଣ ପର୍ଯ୍ୟଟକ ଭୁବନେଶ୍ବର ଚାଲିଆସିଛନ୍ତି । ସେମାନେ ହେଲେ ତୁରୋଭ ମିଖାଇଲ ଓ ପାନାସେଙ୍କୋ ନତାଲିଆ । ପୋଲିସ ସେମାନଙ୍କୁ କଡ଼ା ସୁରକ୍ଷା ଭିତରେ ରାୟଗଡ଼ା ସୀମା ପାର କରାଇଛି । ଘଟଣାସ୍ଥଳରେ ଦକ୍ଷିଣ-ପଶ୍ଚିମାଞ୍ଚଳ ଡିଆଇଜି ପହଞ୍ଚି ତଦନ୍ତ ଆରମ୍ଭ କରିଛନ୍ତି ।

ଗତ ୨୨ ତାରିଖରେ ଭ୍ଲାଦିମର ବିଦାନୋଭ ଓ ୨୪ ତାରିଖରେ ଆଣ୍ଟୋଭ ପାଭେଲଙ୍କ ମୃତ୍ୟୁ ଘଟିଥିଲା । ରାୟଗଡ଼ା ଟାଉନର ହୋଟେଲ ସାଇ ଇଣ୍ଟରନ୍ୟାସନାଲ ଠାରେ ଏହି ଦୁଇ ଜଣଙ୍କର ମୃତ୍ୟୁ ଏବେ ବି ସନ୍ଦେହ ଘେରରେ ରହିଛି। ମୃତ ଆଣ୍ଟୋଭ ପାଭେଲ ରୁଷିଆର ଜଣେ ପୂର୍ବତନ ସାଂସଦ ବୋଲି ଜଣାପଡିଛି । ଏଣେ ପୋଲିସ ମଧ୍ୟ କିଛି ପ୍ରତିକ୍ରିୟା ଦେଇ ନାହିଁ । ଏଭଳିକି ତାଙ୍କର ଗାଇଡ ଜିତେନ୍ଦ୍ର ସିଂ ମଧ୍ୟ ମୁହଁ ବନ୍ଦ ରଖିଛନ୍ତି । ଫଳରେ ଦୁଇ ପର୍ଯ୍ୟଟକଙ୍କ ମୃତ୍ୟୁ ନେଇ ରହସ୍ୟ ବଢ଼ିବାରେ ଲାଗିଛି। ଉଭୟଙ୍କ ଶବ ବ୍ୟବଚ୍ଛେଦ ପରେ ମୃତ୍ୟୁ ପ୍ରମାଣପତ୍ର ପ୍ରଦାନ କରିଛି ପୋଲିସ। ଦୁଇ ମୃତକଙ୍କୁ ଅନ୍ୟ କେହି ଭେଟିନଥିଲେ। ସେମାନଙ୍କ ଭାଷା କେହି ଜାଣନ୍ତିନି ବୋଲି ସଫେଇ ଦେଇଛନ୍ତି ହୋଟେଲ ମ୍ୟାନେଜର । ସେହିପରି ଭୁବନେଶ୍ବର ପଳାଇଥିବା ତୁରୋଭ ମିଖାଇଲ ମଧ୍ୟ କିଛି କହିବା ପାଇଁ ମନା କରିଦେଇଛନ୍ତି ।