ବନ୍ଧୁକ ସହ ଦୁଇ ଡକାୟତ ଗିରଫ, ଦୁଇ ରାଉଣ୍ଡ ଅଫୁଟା ଗୁଳି ଜବତ

ବଡ଼ମ୍ବା: ଡକାୟତି ଯୋଜନା ପଣ୍ଡ । ଡକାୟତି ପାଇଁ ଉଦ୍ୟମ କରୁଥିବା ବେଳେ ଧରା ପଡ଼ିଲେ ଦୁଇ ଡକାୟତ । ସେମାନଙ୍କ ପାଖରୁ ୨ ରାଉଣ୍ଡ ଅଫୁଟା ଗୁଳି, ନଗଦ ପାଞ୍ଚ ହଜାର ଟଙ୍କା ଓ ଏକ ବାଇକ ଜବତ କରିଛି ବଡ଼ମ୍ବା ପୋଲିସ । ଦମକଳ କେନ୍ଦ୍ର ନିକଟରେ ଡକାୟତି କରିବା ପାଇଁ ଉଦ୍ୟମ କରୁଥିବା ବେଳେ ପୋଲିସ ହାତରେ ଧରାପଡ଼ିଛନ୍ତି ଦୁଇ ଡକାୟତ ।

ବୁଧବାର ରାତିରେ ଏକ ନିୟୁଜ ଚାନେଲର ଟିମ ନିଜର କାମ ସାରି କାର୍ଯ୍ୟାଳୟ ଫେରୁଥିବା ସମୟରେ ବଡ଼ମ୍ବା ଦମକଳ କେନ୍ଦ୍ର ନିକଟରେ ଦୁଇ ଯୁବକ ତାଙ୍କ ଗାଡ଼ି ଅଟକାଇ ବନ୍ଧୁକ ଦେଖାଇ ୫ ହଜାର ଟଙ୍କା ଛଡ଼ାଇ ନେଇଥିଲେ । ଖବର ପାଇ ବଡ଼ମ୍ବା ଥାନା ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ଦୁଇ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଥିଲେ । ସେମାନଙ୍କ ନିକଟରୁ ଏକ ଚୋରା ଦେଶୀ ବନ୍ଧୁକ, ୨ ରାଉଣ୍ଡ ଅଫୁଟା ଗୁଳି, ୨ଟି ମୋବାଇଲ ଫୋନ ଓ ୫ ହଜାର ଟଙ୍କା ସମେତ ଏକ ଟିଭିଏସ ମୋଟରସାଇକେଲ ଜବତ କରାଯାଇଛି । ଦୁଇ ଗିରଫ ଅଭିଯୁକ୍ତ ହେଲେ ବଡ଼ମ୍ବା ଥାନା ଅନ୍ତର୍ଗତ କୋଟପଲା ଗାଁର ଚିତ୍ରସେନ ଓରଫ ରାଜେଶ ସାହୁ ଏବଂ ଶେଖ ମୁଜାଫର ।