ଉଡ଼ାଣ ଭରିଛନ୍ତି ଭାରତୀୟ, ଶନିବାର ଅଟକ ରଖିଥିଲେ ତାଲିବାନୀ

କାବୁଲ: ଆଫଗାନିସ୍ତାନକୁ ତାଲିବାନମାନେ କବଜା କରିବା ପରେ ସ୍ବଦେଶ ଫେରୁଛନ୍ତି ବିଭିନ୍ନ ଦେଶର ନାଗରିକ । ଆଜି ଆଫଗାନିସ୍ତାନର ରାଜଧାନୀ କାବୁଲରୁ ଫେରିଛନ୍ତି ଭାରତୀୟ । କାବୁଲରୁ ଦିଲ୍ଲୀ ଫେରିଛନ୍ତି ୮୭ ଜଣ ଭାରତୀୟ । ଏୟାର ଇଣ୍ଡିଆ ବିମାନଯୋଗେ ଏମାନେ ତାଜିକସ୍ତାନ ଦେଇ ଦିଲ୍ଲୀ ଆସିଛନ୍ତି । ୮୭ ଜଣକ ମଧ୍ୟରେ ଦୁଇ ଜଣ ନେପାଳୀ ନାଗରିକ ମଧ୍ୟ ଅଛନ୍ତି ।

ବିମାନରେ ଫେରିବାବେଳେ ଭାରତ ମାତା କି ଜୟ ନାରା ଦେଇଥିଲେ ଯାତ୍ରୀମାନେ । ସେପଟେ ଅନ୍ୟ ଏକ ବିମାନରେ ଭାରତ ଫେରୁଛନ୍ତି ୧୩୫ ଜଣ ଭାରତୀୟ । କାବୁଲରୁ ପ୍ରତିଦନ ଭାରତ ଆସିବା ପାଇଁ ଦୁଇଟି ବିମାନ ଉଡାଣକୁ ଅନୁମତି ମିଳିଛି । ଗତକାଲି ପ୍ରବାସୀ ଭାରତୀୟଙ୍କୁ ଏୟାରପୋର୍ଟରୁ ନେଇଯାଇଥିଲା ତାଲିବାନ  । କିନ୍ତୁ ପରବର୍ତ୍ତୀ ସମୟରେ ସମସ୍ତେ ସୁରକ୍ଷିତ ଥିବା ନେଇ ସୂଚନା ଆସିଥିଲା  ।

ଆଫଗାନିସ୍ତାର ରାଜଧାନୀ କାବୁଲ ଏୟାରପୋର୍ଟ ନିକଟରୁ  ସମସ୍ତ ଭାରତୀୟ ଯାତ୍ରୀଙ୍କୁ ଅଟକ ରଖିଥିଲା ତାଲିବାନୀ । ତାଲିବାନୀ ସମସ୍ତ ଲୋକଙ୍କ ପାସପୋର୍ଟ ଯାଞ୍ଚ କରିବା ପରେ ସେମାନଙ୍କୁ ଛାଡ଼ିଦେଇଥିବା ଜଣା ପଡ଼ିଛି । ଆଫଗାନ ମିଡିଆ ସୂଚନା ମୁତାବକ ତାଲିବାନୀ ପାଖାପାଖି ୧୫୦ ଭାରତୀୟଙ୍କୁ ଧରିନେଇଥିଲା । ତେବେ ଆବଶ୍ୟକ ଯାଞ୍ଚ ପରେ ପୁଣି ସେମାନଙ୍କୁ ଛାଡ଼ିଥିଲେ  ।