ଫେରିଲା ଆମ୍ବ ଟାକୁଆ ଜାଉ କଳଙ୍କ; ଆମ୍ବ ଟାକୁଆ ଜାଉ ଖାଇ ୨ ମୃତ୍ଯୁ

କନ୍ଧମାଳ: ଫେରିଲା ଆମ୍ବ ଟାକୁଆ ଜାଉ କଳଙ୍କ । କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ବ୍ଳକ ମାଣ୍ଡିପଙ୍କା ଗାଁରେ ଆମ୍ବ ଟାକୁଆ ଜାଉ ଖାଇ ଦୁଇ ଜଣଙ୍କର ମୃତ୍ଯୁ ହୋଇଛି । ଏହାଛଡ଼ା ୬ ଜଣ ଗୁରୁତର ଅବସ୍ଥାରେ ବ୍ରହ୍ମପୁର ଏମକେସିଜି ମେଡିକାଲରେ ଚିକିତ୍ସିତ ହେଉଛନ୍ତି । ମୃତକ ହେଲେ ମାଣ୍ଡିପଙ୍କା ଗାଁର ୩୦ ବର୍ଷୀୟା ରୁନି ମାଝୀ ଓ ୨୮ ବର୍ଷୀୟା ରନିତା ପାଟମାଝୀ । ୬ ଗୁରୁତର ହେଲେ ପ୍ରଭାତୀ ମାଝୀ, ଶୁସନା ମାଝୀ, ଜିତା ମାଝୀ, ଦ୍ରେଙ୍ଗାଲୁ ପାଟମାଝୀ, ଜୀବନ୍ତ ପାଟମାଝୀ ଓ ଟୁନି ମାଝୀ । ଅଭିଯୋଗ ଅନୁସାରେ ଗତ ୨୩ ତାରିଖରେ ୨୦ ପରିବାରର ୩୦ରୁ ଅଧିକ ଲୋକ ପ୍ରଥମେ ଆମ୍ବ ଟାକୁଆ ଜାଉ କରି ଖାଇଥିଲେ । ବଳକା ଟାକୁଆକୁ ଗତ ୨୯ ତାରିଖରେ ପୁଣିଥରେ ଜାଉକରି ଖାଇଥିଲେ ।

ଗତକାଲି ରନିତା ପାଟମାଝୀଙ୍କ ଦେହ ଗୁରୁତର ହେବାରୁ ତାଙ୍କୁ ପ୍ରଥମେ ବ୍ରାହ୍ମଣୀଗାଁ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ଓ ପରେ ବ୍ରହ୍ମପୁର ଏସକେସିଜିକୁ ସ୍ଥାନାନ୍ତରିତ କରାଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ଯୁ ହୋଇଥିଲା । ଆଜି ସକାଳୁ ପୁଣି ୭ ଜଣଙ୍କ ଅବସ୍ଥା ଗୁରୁତର ହେବାରୁ ସମସ୍ତଙ୍କୁ ବ୍ରାହ୍ମଣୀଗାଁ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ସେମାନଙ୍କୁ ବ୍ରହ୍ମପୁର ସ୍ଥାନାନ୍ତର କରିବାବେଳେ ବାଟରେ ରୁନୁ ମାଝୀଙ୍କର ମୃତ୍ୟୁ ହୋଇଥିଲା । ଏବେ ଅନ୍ଯ ୬ ଜଣ ଏମକେସିଜିରେ ଚିକିତ୍ସିତ ହେଉଛନ୍ତି । ତହସିଲଦାର ଓ ବିଡିଓ ଘଟଣାସ୍ଥଳରେ ପହଞ୍ଚି ଅନୁଧ୍ଯାନ କରିଛନ୍ତି ।