ରାଜଧାନୀରେ ଏକ ଆପାର୍ଟମେଣ୍ଟରେ ୨ ଜଣଙ୍କୁ କରୋନା
ଭୁବନେଶ୍ୱର: ରାଜଧାନୀରେ ବଢ଼ୁଛି କରୋନା ସଂକ୍ରମଣ । ଭୁବନେଶ୍ୱରର ଏକ ଆପାର୍ଟମେଣ୍ଟରୁ ୨ଜଣ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ପୋଖରୀପୁଟ କୋକିଳା ଗ୍ରୀନ ଆପାର୍ଟମେଣ୍ଟରୁ ଦୁଇଜଣଙ୍କ କରୋନା ପରୀକ୍ଷା ରିପୋର୍ଟ ପଜିଟିଭ୍ ଆସିଛି । ତେଣୁ ଆପାର୍ଟମେଣ୍ଟର ସବୁ ଲୋକଙ୍କର କୋଭିଡ୍ ଟେଷ୍ଟ କରାଯିବ । ଆବଶ୍ୟକ ପଡ଼ିଲେ ମାଇକ୍ରୋ କଣ୍ଟେନମେଣ୍ଟ ଜୋନ୍ କରାଯିବ ବୋଲି ଭୁବନେଶ୍ୱର ମହାନଗର ନିଗମ ବିଏମ୍ସି ପକ୍ଷରୁ ସୂଚନା ଦେଇଛି ।
୨୬ ତାରିଖ ସୁଦ୍ଧା ବିଏମସି ଅଞ୍ଚଳରୁ ମୋଟ ୩୨ ହଜାର ୨୬୩ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ସେଥିମଧ୍ୟରୁ ୩୧ ହଜାର ୮୫୩ ଜଣ ସୁସ୍ଥ ହୋଇ ସାରିଥିବା ବେଳେ ୧୩୯ଟି ସକ୍ରିୟ ସଂକ୍ରମଣ ମାମଲା ରହିଛି । ୨୫୦ ଜଣ କରୋନାରେ ଜୀବନ ହାରିଛନ୍ତି ।
କରୋନାର ଦ୍ୱିତୀୟ ଲହର ସଂକ୍ରମଣକୁ ଦୃଷ୍ଟିରେ ରଖି ରାଜଧାନୀରେ କୋଭିଡ୍ ନିୟମକୁ କଡ଼ାକଡ଼ି କରାଯାଇଛି । ପୋଲିସ ବିଭିନ୍ନ ଛକ ସ୍ଥାନରେ ଲୋକଙ୍କୁ ସାମାଜିକ ଦୂରତା ରକ୍ଷା ଓ ମାସ୍କ ପିନ୍ଧିବା ଦିଗରେ ସଚେତନ କରାଇବା ସହ ଆଇନ୍ ଉଲ୍ଲଂଘନକାରୀଙ୍କ ଠାରୁ ଜରିମାନା ଆଦାୟ କରୁଛି ।
