ଗଞ୍ଜେଇ ଚୋରା ଚାଲାଣ ବେଳେ ଦୁଇ ଗିରଫ, ଓଡ଼ିଶା ଦେଇ ଯାଉଥିଲା ବିହାର
କୋରାପୁଟ: କିଛି ଦିନର ବ୍ୟବଧାନ ପରେ ପୁଣି ବିପୁଳ ପରିମାଣରେ ଗଂଜେଇ ଜବତ । ଏକ ବୋଲେରୋ ଗାଡ଼ିରେ ଅଭିନବ ଉପାୟରେ ଗଞ୍ଜେଇ ଚୋରା ଚାଲାଣ ବେଳେ ପୋଲିସ ହାତରେ ଧରା ପଡିଛି ।
କୋରାପୁଟ ଜିଲ୍ଲା ଲମତାପୁଟ ଓ ମାଛକୁଣ୍ଡ ପୋଲିସ ରାତିରେ ପାଟ୍ରୋଲିଂ କରୁଥିବା ସମୟରେ ମାଛକୁଣ୍ଡ ଅଞ୍ଚଳରୁ ଏକ ବୋଲେର ଗାଡି ଦ୍ରୁତ ଗତିରେ ଆସୁଥିଲା । ପୋଲିସ ମନରେ ସନ୍ଦେହ ସୃଷ୍ଟି ହେବାରୁ ଗାଡିକୁ ଅଟକାଇବାକୁ ଚେଷ୍ଟା କରିଥିଲା । ତେବେ ପୋଲିସକୁ ଦେଖି ସେମାନେ ଗାଡ଼ିର ସ୍ପିଡ୍ ଅଧିକ ବଢ଼ାଇଥିଲେ ।
ତେବେ ଏଥିରେ ଗଂଜେଇ ଚୋରା ଚାଲାଣ ହେଉଥିବା ନେଇ ଲମତାପୁଟ ପୋଲିସ ସନ୍ଦେହ କରିଥିଲା । ପରେ ଗାଡିକୁ କାବୁ କରିବା ପାଇଁ ଏହାର ପିଛା କରିଥିଲା । କନାଗାଁ ଛକ ନିକଟରେ ପୋଲିସ ଗଞ୍ଜେଇ ଭର୍ତ୍ତି ବୋଲେରୋ ଗାଡି ସହ ୨ଜଣକୁ ଧରିବାରେ ସଫଳ ହୋଇଥିଲା । ପରେ ଜବତ ବୋଲେରୋ ଗାଡି ଓ ୨ଜଣକୁ ଲମତାପୁଟ ଥାନାରେ ଆଣି ପଚରା ଉଚରା କରିବା ସହ ବୋଲେର ଗାଡିରୁ ଯାଞ୍ଚ କରି ସେଥିରୁ ୧୩୪.୬୦୦ ଗ୍ରାମ ଗଞ୍ଜେଇ ଜବତ କରିଥିଲା । ଗଞ୍ଜେଇ ମାଫିଆ ମାନେ ଏକ ଅଭିନବ ଉପାୟରେ ସିଟ୍ ତଳେ ଗଞ୍ଜେଇ ଭର୍ତ୍ତି କରି ଗଞ୍ଜେଇ ଚୋରା ଚାଲାଣ କରୁଥିଲେ । ଜବତ ଗଞ୍ଜେଇ ର ଆନୁମାନିକ ମୂଲ୍ୟ ସ୍ଥାନୀୟ ଅଞ୍ଚଳରେ ୪ଲକ୍ଷ ଟଙ୍କା ହେବ ।
ଏହି ଗଂଜେଇ ଆନ୍ଧ୍ରପ୍ରଦେଶରୁ ମାଛକୁଣ୍ଡ, ଲମତାପୁଟ ଓ ଜୟପୁର ରାସ୍ତା ଦେଇ ବିହାର ଚୋରା ଚାଲାଣ ହେଉଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । ବିହାର ଅଞ୍ଚଳର ଚତୁରାମ ନାମକ ଜଣେ ବୋଲେର ଡ୍ରାଇଭର ଓ ଦିଲ୍ଲୀ ଅଞ୍ଚଳର ରାଜିଆପାସବାନ ନାମକ ଯୁବକକୁ ଲମତାପୁଟ ପୋଲିସ ଗିରଫ କରିଛି ।
