ରୂପାଲି ଛକରେ ଯୁବକଙ୍କୁ ପିଟିପିଟି ହତ୍ୟା, ୨ ଗିରଫ

ଭୁବନେଶ୍ୱର: ବିଳମ୍ବିତ ରାତିରେ ରୂପାଲି ଛକରେ ମର୍ଡର । ଯୁବକଙ୍କୁ ପିଟିପିଟି ନିର୍ମମ ହତ୍ୟା । ଗତକାଲି ବିଳମ୍ବିତ ରାତିରେ ଏଭଳି ଘଟଣା ଘଟିଥିବା ବେଳେ, ମୃତକ ଜଣଙ୍କ ଚା ଦୋକାନୀ ହୋଇଥିବା ଜଣାପଡିଛି । ମୃତ ଯୁବକଙ୍କ ଘର ପଥରବନ୍ଧ ବସ୍ତିରେ ବୋଲି ଜଣାପଡିଛି । ଘଟଣାରେ ପୋଲିସ ୨ ଅଭିଯୁକ୍ତଙ୍କୁ ଗିରଫ କରିଛି । ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ପହଞ୍ଚି ତଦନ୍ତ ଆରମ୍ଭ କରିଛି ।

ଡିସିପିଙ୍କ ସୂଚନା ଅନୁସାରେ, ବାଣୀବିହାର ଛକରେ ସୌମ୍ୟ ରଞ୍ଜନ କୁଣ୍ଡୁ ଏକ ପାନ ଦୋକାନ କରିଥିଲା । ଦୋକାନ କରିବା ନେଇ ଦୁଇ ଜଣ କାବୁ ଦାସ, ପାଉଣୀ ଦାସଙ୍କ ସହ ତାଙ୍କର ଝଗଡା ହୋଇଥିଲା । ସେମାନଙ୍କର ଘର ପଥରବନ୍ଧ ବସ୍ତି ଓ ଧିରୀକୁଟି ବସ୍ତି । ଗତକାଲି ରାତି ପ୍ରାୟ ୨ଟା ବେଳେ ଏହି ଘଟଣା ଘଟିଥିଲା । ଦୋକାନ ବସାଇବାକୁ ନେଇ ବିଳମ୍ବିତ ରାତିରେ ମଦ ପିଇ ପାଟିତୁଣ୍ଡ ହୋଇଥିଲା । ଧାରୁଆ ଅସ୍ତ୍ର ଓ ବାଉଁଶରେ ସୌମ୍ୟଙ୍କୁ ଆକ୍ରମଣ ହୋଇଥିଲା । ଏମ୍ସରେ ଚିକିତ୍ସାଧୀନ ଥିବା ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ଭୁବନେଶ୍ବର ଡିସିପି ସୂଚନା ଦେଇଛନ୍ତି ।