ଇଡି ଚଢ଼ାଉ ବେଳେ ମୁଖ୍ୟମନ୍ତ୍ରୀଙ୍କ ପାଖ ଲୋକ ଘରୁ ମିଳିଲା AK-47 ରାଇଫଲ୍
1 min read
ରାଞ୍ଚି: ଖଣି ଦୁର୍ନୀତି ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ବୁଧବାର ଢାରଖଣ୍ଡର ରାଜଧାନୀ ରାଞ୍ଚିରେ ଚଢ଼ାଉ ବେଳେ ଏକ ଘରୁ ଦୁଇଟି ଏକେ-୪୭ ରାଇଫଲ ଜବତ କରିଛି । ଯେଉଁ ଘରୁ ଏକେ-୪୭ ରାଇଫଲ ମିଳିଛି ତାହା ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ସହଯୋଗୀ ପ୍ରେମ ପ୍ରକାଶଙ୍କର ବୋଲି ଜଣାପଡ଼ିଛି। ତେବେ ଏହି ରାଇଫଲ କେଉଁଠୁ ଆସିଲା ଏବଂ ଏହାକୁ ବେଆଇନ ଭାବେ ଅଣାଯାଇଛି କି ନାହିଁ ତାହା ସ୍ପଷ୍ଟ ହୋଇନାହିଁ । ତେବେ ଏ ନେଇ ପ୍ରେମ ପ୍ରକାଶ କିମ୍ବା ମୁଖ୍ୟମନ୍ତ୍ରୀ ସୋରେନ ବର୍ତ୍ତମାନ ସୁଦ୍ଧା କୌଣସି ପ୍ରତିକ୍ରିୟା ଦେଇନାହାଁନ୍ତି। ସୂଚନା ଅନୁଯାୟୀ ପ୍ରବର୍ତ୍ତନ ନିର୍ଦ୍ଦେଶାଳୟ ବୁଧବାର ଝାଡ଼ଖଣ୍ଡ ସମେତ ବିହାର, ତାମିଲନାଡୁ ଏବଂ ଦିଲ୍ଲୀ-ଏନସିଆରର ୨୦ଟି ସ୍ଥାନରେ ଚଢ଼ାଉ କରିଛି।
ସୂଚନା ମୁତାବକ ମୁଖ୍ୟମନ୍ତ୍ରୀ ସୋରେନଙ୍କ ରାଜନୈତିକ ସହାୟକ ପଙ୍କଜ ମିଶ୍ରଙ୍କ ସହଯୋଗୀ ବଚ୍ଚୁ ଯାଦବ ଇଡିଙ୍କୁ ଦେଇଥିବା ବୟାନ ଆଧାରରେ ଆଜି ରାଜ୍ୟର ବିଭିନ୍ନ ସ୍ଥାନରେ ଚଢ଼ାଉ ହୋଇଥିଲା । ବଚ୍ଚୁ ଯାଦବ ବର୍ତ୍ତମାନ ଜେଲରେ ଅଛନ୍ତି। ଏହା ପୂର୍ବରୁ ଜୁଲାଇ ୮ରେ ପଙ୍କଜ ମିଶ୍ର ଏବଂ ତାଙ୍କ ସହଯୋଗୀଙ୍କ ଉପରେ ଇଡି ଝାଡଖଣ୍ଡର ୧୯ଟି ସ୍ଥାନ ଉପରେ ଚଢ଼ାଉ କରିଥିଲା। ଜଣାଇଦେବାକୁ ଚାହୁଁ ଯେ ଗତ ମାର୍ଚ୍ଚରେ ପଙ୍କଜ ମିଶ୍ର ଏବଂ ଅନ୍ୟମାନଙ୍କ ବିରୋଧରେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ମାମଲା ରୁଜୁ ହେଇଛି ।
