ଟ୍ୱିଟର ବିବାଦ, ଇସ୍ତଫା ଦେଲେ ଧର୍ମେନ୍ଦ୍ର

ନୂଆଦିଲ୍ଲୀ: ଟ୍ୱିଟରକୁ ନେଇ ଦେଶରେ ବଢୁଛି ବିବାଦ । ଏହାରି ଭିତରେ ଟ୍ୱିଟର ପକ୍ଷରୁ ନବନିଯୁକ୍ତ ଭାରତୀୟ ଅଧିକାରୀ ଧର୍ମେନ୍ଦ୍ର ଚତୁର ଇସ୍ତଫା ଦେଇଛନ୍ତି । ନୂଆ ଆଇଟି ନିୟମ ପାଳନ କରିବା ପାଇଁ ଟ୍ୱିଟର ପକ୍ଷରୁ ଏହି ନିଯୁକ୍ତି ହୋଇଥିଲା । ନିୟମ ଅନୁସାରେ, ଏହି ନିଯୁକ୍ତି ଅତି ଜରୁରୀ । ତେବେ ଧର୍ମେନ୍ଦ୍ର କାହିଁକି ଇସ୍ତଫା ଦେଲେ ସେନେଇ କିଛି କାରଣ ଜଣାପଡ଼ିନାହିଁ । ଗତ କିଛି ଦିନ ହେଲା ଏନେଇ କେନ୍ଦ୍ର ସରକାର ଓ ଟ୍ୱିଟର ମଧ୍ୟରେ ବିବାଦ ବଢ଼ିବାରେ ଲାଗିଛି ।

ସରକାରଙ୍କ ପକ୍ଷରୁ ବାରମ୍ବାର ଚେତାବନୀ ମଧ୍ୟ ଦିଆଯାଇଛି । ନୂଆ ନିୟମ ଅନୁସାରେ ଦେଶରେ କୌଣସି ସୋସିଆଲ ମିଡିଆରେ ୫୦ ଲକ୍ଷରୁ ଅଧିକ ବ୍ୟବହାରକାରୀ ଥିଲେ କମ୍ପାନୀ, ଜଣେ ଅଧିକାରୀଙ୍କୁ ନିଯୁକ୍ତି କରିବାକୁ ବାଧ୍ୟ । ଏହାଦ୍ୱାରା କୌଣସି ଅଭିଯୋଗ ହେଲେ ତୁରନ୍ତ ତାଙ୍କୁ ଯୋଗାଯୋଗ କରାଯାଇପାରିବ । ଏହି ନିୟମ ଆଧାରରେ ଟ୍ୱିଟର ଭାରତରେ ଧର୍ମେନ୍ଦ୍ର ଚତୁରଙ୍କୁ ନିଯୁକ୍ତି ଦେଇଥିଲା । ହେଲେ ସେ ଇସ୍ତଫା ଦେଇଛନ୍ତି ।