ଘରେ ପଶି ୪୦ ବର୍ଷୀୟ ଟିଭି ସାମ୍ବାଦିକଙ୍କୁ ଗୁଳି କରି ହତ୍ୟା

ଲକ୍ଷ୍ନୌ: ସୋମବାର ରାତିରେ ଜଣେ ଟିଭି ସାମ୍ବାଦିକଙ୍କୁ ବୀଭତ୍ସ ହତ୍ୟା କରାଯାଇଛି । ଗଣମାଧ୍ୟମର ସ୍ୱର ଚାପିବାକୁ ଏଭଳି ହତ୍ୟାକାଣ୍ଡ ହୋଇଛି ଉତ୍ତରପ୍ରଦେଶରେ । ବାଲିୟା ଜିଲ୍ଲାରେ କାର୍ଯ୍ୟରତ ଏକ ଘରୋଇ ଟିଭି ଚ୍ୟାନେଲ୍ ସାମ୍ବାଦିକ ରତନ ସିଂହଙ୍କୁ ଦୁର୍ବୃତ୍ତମାନେ ଗୁଳିମାଡ଼ କରିଥିଲେ । ଘଟଣାସ୍ଥଳରେ ରତନଙ୍କ ମୃତ୍ୟୁ ହୋଇଥିବା ଜଣାପଡ଼ିଛି ।

୪୦ ବର୍ଷୀୟ ରତନ ସିଂହ ସାହାରା ସମୟ ନ୍ୟୁଜ୍ ଚ୍ୟାନେଲ ପାଇଁ କାମ କରୁଥିଲେ । ଏହି ହତ୍ୟାକାଣ୍ଡ ସୋମବାର ରାତି ପ୍ରାୟ ୯ଟା ବେଳେ ବାଲିୟା ଜିଲ୍ଲାର ଫେଫନା ଥାନା ଅଞ୍ଚଳରେ ଘଟିଛି । ସାମ୍ବାଦିକଙ୍କୁ ହତ୍ୟା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଥିବା ବେଳେ ଗଣମାଧ୍ୟମର ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଘଟଣାସ୍ଥଳରେ ପୋଲିସ ପହଞ୍ଚିଛି ।

ତେବେ, ସାମ୍ବାଦିକ ଜଣଙ୍କୁ ଘରେ ପଶି କିଏ ଓ କାହିଁକି ହତ୍ୟା କଲା ଜଣାପଡ଼ିନାହିଁ । ସୂଚନାରୁ ଜଣାପଡ଼ିଛି ରତନ ଘରକୁ ଫେରୁଥିବା ବେଲେ କିଛି ବନ୍ଧୁକଧାରୀ ତାଙ୍କ ପିଛା କରିଥିଲେ । ସେ ଦୁର୍ବୃତ୍ତଙ୍କ କବଳରୁ ଖସିବା ପାଇଁ ତୁରନ୍ତ ଘରେ ପଶି ଯାଇଥିଲେ । ସେଠାରେ ଦୁର୍ବୃତ୍ତଙ୍କ ତାଙ୍କୁ ଗୁଳି କରିଥିବା ଘଟଣାସ୍ଥଳରେ ହିଁ ରତନଙ୍କ ମୃତ୍ୟୁ ହୋଇଛି ।