ଟିଭି ଅଭିନେତ୍ରୀ ଶ୍ରାବଣୀଙ୍କ ଆତ୍ମହତ୍ୟା, ପ୍ରେମିକ ନାମରେ ଅଭିଯୋଗ ଦାଖଲ

ମୁମ୍ବାଇ: ଗତକାଲି ଦକ୍ଷିଣ ଭାରତୀୟ ସିନେମାର ପ୍ରସିଦ୍ଧ କଳାକାର ଜୟପ୍ରକାଶ ରେଡ୍ଡୀଙ୍କ ପରଲୋକରେ ଚଳଚ୍ଚିତ୍ର ଇଣ୍ଡଷ୍ଟ୍ରିରେ ଶୋକର ଛାୟା ଖେଳି ଯାଇଥିଲା । ମହେଶ ବାବୁଙ୍କ ଠାରୁ ଆରମ୍ଭ କରି ଭେଙ୍କଟେଶଙ୍କ ପର୍ଯ୍ୟନ୍ତ ସୋସିଆଲ ମିଡିଆରେ ଦୁଃଖ ପ୍ରକାଶ କରି ଜେପିଙ୍କୁ ଖୁବ ମନେ ପକାଇ ଥିବାର ନଜର ଆସିଥିଲା । ଜେପିଙ୍କ ବିୟୋଗ ଏକ ପ୍ରକାର ଇଣ୍ଡଷ୍ଟ୍ରିକୁ ଶକ୍ତ ଝଟକା ଦେଇଥିବା ବେଳେ ବୁଧବାରକୁ ଟେଲି ଅଭିନେତ୍ରୀ ଶ୍ରାବଣୀ ଫାଶୀ ଲଗାଇ ଆତ୍ମହତ୍ୟା କରିଥିବା ଖବର ସାମ୍ନାକୁ ଆସିଛି ।

ଖବର ଅନୁସାରେ ତେଲୁଗୁ ଟିଭି ଅଭିନେତ୍ରୀ ଶ୍ରାବଣୀ କୋଣ୍ଡପଲ୍ଲୀ ମଙ୍ଗଳବାର ରାତି ୮ଟାରେ ଆତ୍ମହତ୍ୟା କରିଛନ୍ତି । ସୂଚନାଯୋଗ୍ୟ ମୌନରାଗମ,ମନସୁମମତା ଭଳି ଧାରାବାହିକରେ ନଜର ଆସିଥିଲେ ଶ୍ରାବଣୀ । ଚଳିତ ଦିନ ମାନଙ୍କରେ ଶ୍ରାବଣୀ ମନସୁମମତାରେ ନଜର ଆସୁଥିଲେ ।

ମିଡିଆ ରିପୋର୍ଟ ଅନୁସାରେ ଶ୍ରାବଣୀଙ୍କ ମୃତ ଶରୀର ହାଇଦ୍ରାବାଦର ମଧୁରନଗରରେ ଥିବା ତାଙ୍କ ବାସଭବନରୁ ଉଦ୍ଧାର ହୋଇଛି । ବାଥରୁମ ଛାତରେ ଝୁଲି ରହିଥିଲା ଶ୍ରାବଣୀଙ୍କ ମୃତ ଶରୀର । ପୋଲିସ ଉକ୍ତ ମାମଲାର ତଦନ୍ତ ଆରମ୍ଭ କରି ସାରିଛି । ଶ୍ରାବଣୀଙ୍କ ଶରୀରରକୁ ପୋଷ୍ଟମର୍ଟମ ପାଇଁ ପଠାଯାଇଥିବା ବେଳେ ଅଭିନେତ୍ରୀଙ୍କ ପରିବାର ତାଙ୍କ ବଏଫ୍ରେଣ୍ଡ ବରାଜ୍ ରେଡ୍ଡୀଙ୍କ ନାମରେ ନିର୍ଯାତନା ଅଭିଯୋଗ ଆଣିଛନ୍ତି ।