ନଓ୍ୱାଜ ସରିଫଙ୍କ ଜ୍ୱାଇଁ ଗିରଫ: ସେନା ବିରୋଧରେ ସିନ୍ଧ ପୋଲିସର ବିଦ୍ରୋହ
ଇସଲମାବାଦ: ପାକିସ୍ତାନ ପୂର୍ବ ପ୍ରଧାନମନ୍ତ୍ରୀ ନଓ୍ୱାଜ ସରିଫଙ୍କ ଜ୍ୱାଇଁ କ୍ୟାପଟେନ୍ (ସେବାନିବୃତ୍ତ)ସଫଦରଙ୍କ ଗିରଫକୁ ନେଇ ଦେଶରେ ରାଜନୈତିକ ହଟଚମଟ ଦେଖିବାକୁ ମିଳିଛି । ତାଙ୍କୁ ଗିରଫ କରାଯିବାକୁ ନେଇ ମଧ୍ୟ ଅସନ୍ତୋଷ ଦେଖିବାକୁ ମିଳିଛି । ଏହାକୁ ପ୍ରତିବାଦ କରିଛି ସିନ୍ଧ ପ୍ରାନ୍ତର ପୋଲିସ । ଏଥିସହିତ ବିରୋଧୀ ଦଳଳ, ଓ ଗଣମାଧ୍ୟମର ଚାରିତରଫା ଚାପ ପରେ ପାକିସ୍ତାନ ସେନା ପ୍ରମୁଖ କମର ଜାବେଦ ବାଜବା ପକ୍ଷରୁ ଏ ନେଇ ତଦନ୍ତ ନିର୍ଦ୍ଦେଶ ଦେବାକୁ ପଡ଼ିଛି ।
ଘଟଣାନୁଯାୟୀ, ପାକିସ୍ତାନ ସିନ୍ଧ ପ୍ରାନ୍ତର ରାଜଧାନୀ କରାଚୀରେ ୧୧ ବିରୋଧୀ ଦଳକୁ ନେଇ ଗଠିତ ମହାମେଣ୍ଟ ‘ପାକିସ୍ତାନ ଡେମୋକ୍ରାଟିକ୍ ମୁମେଣ୍ଟ’ (ପିଡିଏମ୍)ର ୧୮ ଅକ୍ଟୋବରରେ ବିଶାଳ ରାଲି ହୋଇଥିଲା । ମରିୟମ୍ ନଓ୍ୱାଜ ରାଲିରେ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଡରୁଆ ବୋଲି କହିଥିଲେ । ତଥା ସେନା ପଛେ ପଛେ ଯାଉଥିବା ବ୍ୟକ୍ତି ବୋଲି କହିଥିଲେ । ଏହା ପୂର୍ବରୁ ଗୁଜରାବାଲାରେ ହୋଇଥିବା ଜନସଭାରେ ନଓ୍ୱାଜ ସରିଫ୍ ମଧ୍ୟ ସେନା ଏବଂ ଇମ୍ରାନ ଖାନଙ୍କ ଉପରେ ଖୁବ୍ ବର୍ଷିଥିଲେ ।
ମରିୟମ୍ ନଓ୍ୱାଜ ପାକିସ୍ତାନ ସେନା ଓ ଇମ୍ରାନଙ୍କ ଉପରେ ବର୍ଷିଲେ
ଇମ୍ରାନ ଖାନଙ୍କୁ ଟାର୍ଗେଟ କରିଛନ୍ତି ମରିୟମ୍ ନଓ୍ୱାଜ । ଏବଂ କହିଛନ୍ତି ଇମ୍ରାନ ନିଜ ବିଫଳତାକୁ ଲୁଚାଇବା ପାଇଁ ପାକିସ୍ତାନ ସେନା ପଛରେ ଲୁଚି ରହିଛି । ସେ କହିଛନ୍ତି ଯେ, ‘ଯେତେବେଳେ ଆପଣଙ୍କୁ ପ୍ରଶ୍ନ ପଚାଯାଉଛି, ସେତେବେଳେ ଆପଣ ସେନା ପଛରେ ଲୁଛି ଯାଉଛନ୍ତି’ । ଆପଣ ଡରୁଆ । ଆପଣ ସେନାର ନାମ ବଦନାମ୍ କରିଛନ୍ତି । ମରିୟମ୍ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଚ୍ୟାଲେଞ୍ଜ କରିଥିଲେ ଯେ, ସେ ତାଙ୍କୁ ଗିରଫ କରିଦେଖାନ୍ତୁ । ସେ ଜେଲ ଯିବାକୁ ଭୟ କରୁନାହାନ୍ତି । କରାଚୀରେ ହୋଇଥିବା ରାଲିକୁ ସମ୍ୱୋଧନ କରିବା ପରେ ମରିୟମ୍ ନଓ୍ୱାଜ ନିଜ ସ୍ୱାମୀଙ୍କ ସହ ହୋଟେଲରେ ପହଞ୍ଚିଥିଲେ ।
ସେହି ଦିନ ରାତିରେ କରାଚି ପୋଲିସ ମରିୟମ୍ ନଓ୍ୱାଜଙ୍କ ସ୍ୱାମୀ କ୍ୟାପଟେନ୍(ସେବାନିବୃତ୍ତ) ମହମ୍ମଦ ସଫଦରଙ୍କୁ ଗିରଫ କରିଛି । ମରିୟମ୍ ଅଭିଯୋଗ କରିଛନ୍ତି ସେ ରହୁଥିବା ହୋଟେଲ ରୁମର କବାଡ଼କୁ ପୋଲିସ ଭାଙ୍ଗିଦେଇଥିଲା, ଏବଂ କ୍ୟାପଟେନ ମହମ୍ମଦ ସଫଦରଙ୍କୁ ଗିରଫ କରିଥିଲା । ତାଙ୍କ ଉପରେ ପୋଲିସ କଥିତ ଭାବେ କାଏଦା ଏ ଆଜମ୍ଙ୍କ ସମାଧିର ପବିତ୍ରତାକୁ ଅବମାନନା କରିଥିବା ଅଭିଯୋଗ ଥିଲା । ଏହା ପରେ ବିରୋଧୀଙ୍କ ପ୍ରବଳ ବିରୋଧ ଏବଂ କୌଣସି ଠୋସ୍ ପ୍ରମାଣ ନଥିବାରୁ ପୋଲିସ ତାଙ୍କୁ କିଛି ଘଣ୍ଟା ମଧ୍ୟରେ ଛାଡ଼ିଦେଇଥିଲା ।
