ତୁର୍କୀ-ସିରିଆ ଭୂକମ୍ପ: ବଢୁଛି ମୃତ୍ୟୁସଂଖ୍ୟା, ଚାରିଆଡେ ପ୍ରଳୟର ବୀଭତ୍ସ ଚିତ୍ର

ତୁର୍କୀ: ଛାରଖାର ଶତାଧିକ ସହର। ଚାରିଆଡେ ପ୍ରଳୟର ବୀଭତ୍ସ ଚିତ୍ର। ପ୍ରତି ମୁହୂର୍ତ୍ତରେ ବଢୁଛି ମୃତ୍ୟୁସଂଖ୍ୟା । ୪୮ଘଣ୍ଟା ପରେ ବି ସରିନି ରେସ୍କ୍ୟୁ ଅପରେସନ। ବିପତ୍ତିଗ୍ରସ୍ତ ରାଷ୍ଟ୍ରରୁ ଆସୁଛି ଛାତିଥରା ଚିତ୍ର। ୨୪ ଘଣ୍ଟା ମଧ୍ୟରେ ତିନି ତିନି ବଡ ଭୂକମ୍ପ ଝଟକା ପରେ ଧ୍ବସ୍ତ ହୋଇଯାଇଛି ତୁର୍କୀ। କେଉଁଠୁ ଭଗ୍ନସ୍ତୁପ ତଳୁ ମୁମୂର୍ଷୂ ଅବସ୍ଥାରେ ଲୋକଙ୍କୁ ଉଦ୍ଧାର କରାଯାଉଛି ତ କେଉଁଠୁ ପୁଳା ପୁଳା ଶବ ଉଦ୍ଧାର କରାଯାଉଛି।

ଏ ଦୃଶ୍ୟ ଖାଲି ତୁର୍କୀ ବା ସିରିଆବାସୀଙ୍କୁ ନୁହେଁ ସାରା ବିଶ୍ବବାସୀଙ୍କୁ କନ୍ଦାଇ ଦେଇଛି। ମଧ୍ୟପ୍ରାଚ୍ୟରେ ଭୂକମ୍ପଜନିତ ମୃତ୍ୟୁ ସଂଖ୍ୟା ୮ହଜାର ପାର କରିଛି। ୧୫ହଜାରରୁ ଊର୍ଦ୍ଧ୍ବ ଲୋକ ଗୁରୁତର ହୋଇଥିବା ବେଳେ ମୃତ୍ୟୁସଂଖ୍ୟା ୨୦ହଜାର ଛୁଇଁପାରେ ବୋଲି ଆଶଙ୍କା କରାଯାଉଛି। ସେପଟେ ତିନି ତିନିଟି ଶକ୍ତିଶାଳୀ ଭୂକମ୍ପ ପରେ ତୁର୍କୀରେ ଏନାଟୋଲିଆନ ଟେକ୍ଟୋନିକ ପ୍ଲେଟ ଓ ଆରବିଆନ ଟେକ୍ଟୋନିକ ୨୨୫କିଲୋମିଟର ପର୍ଯ୍ୟନ୍ତ ଦୂରତା ଦେଖାଯାଇଛି।

https://youtu.be/vwoEVlqMYI8

ଫଳରେ ତୁର୍କୀର ଭୌଗୋଳିକ ସ୍ଥିତି ପ୍ରାୟ ୧୦ଫୁଟ ତଳକୁ ଧସିଯାଇଛି ବୋଲି ବିଶେଷଜ୍ଞ ଅନୁମାନ କରିଛନ୍ତି। ପ୍ରାରମ୍ଭିକ ରିପୋର୍ଟରୁ ଏହି ତଥ୍ୟ ସାମ୍ନାକୁ ଆସିଥିବା ବେଳେ ଆଗାମୀ ଦିନରେ ସାଟେଲାଇଟ ଇମେଜରୁ ସ୍ପଷ୍ଟ ସୂଚନା ମିଳିବ।