ବୋଖନାଗଙ୍କ କୃପା, ଉଦ୍ଧାର ହେବେ ୪୧ ଶ୍ରମିକ
![](https://nandighoshatv.com/wp-content/uploads/2023/11/ବୋଖନାଗଙ୍କ-କୃପାରୁ-ସମ୍ଭବ-1024x576.jpg)
ଉତ୍ତରାଖଣ୍ଡ: ଆଉ ଅଳ୍ପ ସମୟର ଅପେକ୍ଷା । ଉଦ୍ଧାର ହେବେ ୪୧ ଶ୍ରମିକ । ତେବେ ଏହି ଶ୍ରମିକ ଉଦ୍ଧାର ହେବା ପଛରେ ବୋଖନାଗ ଦେବତାଙ୍କ କୃପା ରହିଛି । ସ୍ଥାନୀୟ ଲୋକେ ଏଭଳି କହିଥିବାବେଳେ ଏହାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । ବେଖନାଗଙ୍କ କୋପରୁ ଏଭଳି ଘଟିଥିଲା ଏବଂ ଏବେ କୃପା ହେବା ପରେ ଉଦ୍ଧାର ହେବେ ବୋଲି କୁହାଯାଉଛି। ଏନଡିଆରଏଫ ଟିମ ପାଇପ ମାଧ୍ୟମରେ ଶ୍ରମିକଙ୍କ ପାଖରେ ପହଞ୍ଚି ଉଦ୍ଧାର କରୁଛନ୍ତି । ତେବେ ଏହା ଦେବତାଙ୍କ କୃପାରୁ ସମ୍ଭବ ହୋଇଛି ବୋଲି କୁହାଯାଉଛି ।
ସ୍ଥାନୀୟ ଲୋକେ କହିଛନ୍ତି କି, ଟନେଲର ଠିକ ଉପରେ ରହିଥିବା ଜଙ୍ଗଲରେ ବୋଖନାଗ ଦେବତାଙ୍କ ମନ୍ଦିର ରହିଛି । କମ୍ପାନୀ ଯେତେବେଳେ ଟନେଲ ବନେଇଥିଲା ସେତେବେଳେ ମନ୍ଦିର ତିଆରି କରି ଟନେଲ କାମ ଆରମ୍ଭ କରିବା ପାଇଁ କହିଥିଲା । କିନ୍ତୁ ୨୦୧୯ ମସିହାରୁ ମନ୍ଦିର ନିର୍ମାଣ କରିନାହିଁ । ସେପଟେ ଗାଁ ନିକଟରେ ଥିବା ଛୋଟ ମନ୍ଦିର ମଧ୍ୟ ଭାଙ୍ଗି ଦେଇଥିଲା ଟନେଲ ନିର୍ମାଣକାରୀ କମ୍ପାନୀ । ସ୍ଥାନୀୟ ଲୋକେ ବାରମ୍ବାର ମନେ ପକାଇଥିଲେ ସୁଦ୍ଧା ନିର୍ମାଣକାରୀ ସଂସ୍ଥା ଏହା ଉପରେ ଗୁରୁତ୍ବ ଦେଇନଥିଲା । ଏଣୁ ଦେବତାଙ୍କ କୋପରୁ ଏଭଳି ଅଘଟଣ ଘଟିଛି ଏବଂ ଶ୍ରମିକମାନେ ଫସିଥିବା କୁହାଯାଉଛି।
ବୋଖନାଗ ଏହି ଅଂଚଳକୁ ରକ୍ଷା କରନ୍ତି ବୋଲି ବିଶ୍ବାସ ରହିଛି । କିନ୍ତୁ ଟନେଲ ନିର୍ମାଣକାରୀ ସଂସ୍ଥା ଏହାକୁ କର୍ଣ୍ଣପାତ କରିନଥିଲା । ଯାହାକି ଏଭଳି ବଡ଼ ଅଘଟଣର କାରଣ। ଫସିବା ଦିନରୁ ମଧ୍ୟ ସ୍ଥାନୀୟ ଲୋକେ ଏହା କହିଥିଲେ ମାତ୍ର ପ୍ରଥମେ ବିଶ୍ବାସ କରିନଥିଲେ। ପରେ ଟନେଲ ନିକଟରେ ଦେବାତଙ୍କ ପାଇଁ ଏକ ମନ୍ଦିର ତିଆରି କରାଯାଇଥିଲା । ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କରା ସିଂ ଧାମି ଏବଂ ଉଦ୍ଧାରକାରୀ ଟିମ ମଧ୍ୟ ବୋଖନାଗଙ୍କ ଶରଣ ନେଇଥିଲେ । ପରେ ଦେବତାଙ୍କ କୃପା ହୋଇଛି । ଆଉ ଏବେ ଉଦ୍ଧାର ହେବାକୁ ଯାଉଛନ୍ତି ଫସିଥିବା ୪୧ ଶ୍ରମିକ ।
ମନ୍ଦିରର ପୂଜକ କହିଛନ୍ତି କି, କମ୍ପାନୀ ଅଧିକାରୀ ତାଙ୍କୁ ପରେ ଫୋନ କରିଥିବାବେଳେ ଭୁଲ୍ ମାଗିଥିଲେ । ଏହାପରେ ଟନେଲ ନିକଟରେ ଦେବାତଙ୍କ ଏକ ଛୋଟ ମନ୍ଦିର ପ୍ରତିଷ୍ଠା କରାଯାଇଥିଲା । ବିଶେଷ ପୂଜାଚ୍ଚନା କରାଯିବା ସହ ବୋଖନାଗଙ୍କ କ୍ରୋଧ ଶାନ୍ତ କରାଗଲା । ଏହାସହ ସେ କହିଛନ୍ତି କି, ଉତ୍ତରାଖଣ୍ଡ ହେଉଛି ଦେବଭୂମି । ଏଠାରେ ଯେକୌଣସି ସଡ଼କ, ପୋଲ ଯାହା ନିର୍ମାଣ କରାଯାଉ ପ୍ରଥମେ ଦେବତାଙ୍କ ଏକ ଛୋଟ ମନ୍ଦିର ପ୍ରତିଷ୍ଠା କରାଯାଏ । ଭଗବାନଙ୍କ ଆଶୀର୍ବାଦ ପରେ ନିର୍ମାଣ କାର୍ଯ୍ୟ ଆରମ୍ଭ ହୋଇଥାଏ । ମାତ୍ର ଟେନଲ ନିର୍ମାଣକାରୀ ସଂସ୍ଥା ପ୍ରଥମେ ସ୍ଥାନୀୟ ମନ୍ଦିର ଭାଙ୍ଗିଲା ଏବଂ ନୂଆ ମନ୍ଦିର କାର୍ଯ୍ୟ ପୂର୍ବରୁ ପ୍ରତିଷ୍ଠା କରିନଥିଲେ। ଏହା ଅଘଟଣର ମୁଖ୍ୟ କାରଣ ବୋଲି ମଧ୍ୟ ମନ୍ଦିରର ପୂଜକ କହିଛନ୍ତି ।
ନିକଟରେ ଟନେଲ କାନ୍ଥରେ ପାଣି ଦ୍ୱାରା ସୃଷ୍ଟ ଏକ ଚିତ୍ର ସୋସିଆଲ ମିଡିଆରେ ଭାଇରାଲ ହୋଇଥିଲା । ଟନେଲ ମୁହାଁଣରେ ପ୍ରତିଷ୍ଠା ହୋଇଥିବା ବାବାଙ୍କ ଅସ୍ଥାୟୀ ଛୋଟ ମନ୍ଦିର ପଛପଟେ ଗୁମ୍ଫା କାନ୍ଥରେ ପାଣିରେ ଏକ ଆକୃତି ସୃଷ୍ଟି ହୋଇଥିଲା । ଆକୃତି ଭଗବାନ ଶିବଙ୍କ ଭଳି ଥିଲା । ଯାହାକୁ ଭଗବାନଙ୍କ ଆର୍ଶିବାଦ ବୋଲି ସ୍ଥାନୀୟ ଲୋକଙ୍କ ମଧ୍ୟରେ ଚର୍ଚ୍ଚା ହୋଇଥିଲା ।