ଚୀନ ବିରୋଧରେ ଟ୍ରମ୍ପଙ୍କ ବଡ଼ ପଦକ୍ଷେପ ; ନଭେମ୍ବର ୧ରୁ ଚୀନ ବିରୋଧରେ ଲାଗୁ ହେବ ୧୦୦ ପ୍ରତିଶତ ଟାରିଫ

ନନ୍ଦିଘୋଷ ବ୍ୟୁରୋ :  ଚୀନ ବିରୋଧରେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଆଉ ଏକ ବଡ଼ ପଦକ୍ଷେପ। ଆସନ୍ତା ନଭେମ୍ବର ୧ରୁ ଚୀନ ବିରୋଧରେ ଆମେରିକା ଲାଗୁ କରିବ  ୧୦୦ ପ୍ରତିଶତ ଟାରିଫ। ଏହି ଘୋଷଣା ଯୋଗୁ ପ୍ରଭାବିତ ହେବ ଚୀନର ରପ୍ତାନି। ଟ୍ରମ୍ପଙ୍କ ଏହି ଘୋଷଣା ପରେ ଦୁଇ ଦେଶ ମଧ୍ୟରେ କୂଟନୈତିକ ଓ ବାଣିଜ୍ୟିକ ଉତ୍ତେଜନା ଅଧିକ ହେବା ଆଶଙ୍କା କରାଯାଉଛି। ବାଣିଜ୍ୟ କ୍ଷେତ୍ରରେ ଚୀନ ଅନେକ ବିରୋଧାତ୍ମକ ପଦକ୍ଷେପ ନେଉଥିବା ପ୍ରତିବାଦରେ ଆମେରିକା ଏହି ନିଷ୍ପତ୍ତି ନେଇଛି ବୋଲି କହିଛନ୍ତି ଟ୍ରମ୍ପ। ସୋସିଆଲ ମିଡିଆରେ ଟ୍ରମ୍ପ କହିଛନ୍ତି- ବର୍ତ୍ତମାନ ଯେଉଁ ହାରରେ ଚୀନ ଟାରିଫ ପ୍ରଦାନ କରୁଛି ଆସନ୍ତା ନଭେମ୍ବର ୧ରୁ ତାହା ଉପରେ ଅଧିକ ୧୦୦ ପ୍ରତିଶତ ଟାରିଫ ଦେବ। ନିଜ ଦେଶରେ ପ୍ରସ୍ତୁତ ସାମଗ୍ରୀ ଉପରେ ରପ୍ତାନି କଟକଣା ଲଗାଇବା ଲାଗି ଚୀନ ଯୋଜନା କରୁଥିବା ସୂଚନା ମିଳିବା ପରେ ଟ୍ରମ୍ପ ଏହି ନିର୍ଦ୍ଦେଶ ଦେଇଛନ୍ତି।