ନନ୍ଦିଘୋଷ ବ୍ୟୁରୋ : ତେଲ ପାଇଁ ଅପରେସନ ଭେନେଜୁଏଲା ପରେ ଏବେ ଟ୍ରମ୍ପଙ୍କ ଆଖି ଗ୍ରୀନଲାଣ୍ଡ ଉପରେ। ଆମେରିକାର ରାଷ୍ଟ୍ରପତି ବର୍ତ୍ତମାନ ଗ୍ରୀନଲାଣ୍ଡ ଦଖଲ କରିବାକୁ ଟାର୍ଗେଟ ରଖିଛନ୍ତି। ହ୍ଵାଇଟ ହାଉସ ପକ୍ଷରୁ କୁହାଯାଇଛି, ଏଥିପାଇଁ ଦରକାର ପଡ଼ିଲେ ବଳ ମଧ୍ୟ ପ୍ରୟୋଗ କରାଯିବ। ଆମେରିକାର ସୁରକ୍ଷା କାରଣରୁ ଗ୍ରୀନଲାଣ୍ଡ ଆମ ହାତକୁ ଆସିବା ଦରକାର ବୋଲି ହ୍ଵାଇଟ ହାଉସର ମୁଖପାତ୍ର କହିଛନ୍ତି। ଏହାକୁ ନେଇ ୟୁରୋପରେ ହଲଚଲ୍ ସୃଷ୍ଟି ହୋଇଛି। କାରଣ ଗ୍ରୀନଲାଣ୍ଡ ଉତ୍ତର ମେରୁ ଅଞ୍ଚଳର ଏକ ଦ୍ଵୀପ। ଏହା ଏକ ସ୍ଵୟଂଶାସିତ ଦ୍ଵୀପ। କିନ୍ତୁ ଏହା ଡେନମାର୍କ ଅଧୀନରେ ଅଛି। ଗ୍ରୀନଲାଣ୍ଡରେ ଅନେକ ବିରଳ ଧାତୁ ଥିବା କୁହାଯାଉଛି। ତା ସହିତ ସାମୁଦ୍ରିକ ପଥ ପାଇଁ ଏହାର ସ୍ଵତନ୍ତ୍ର ଗୁରୁତ୍ଵ ରହିଛି। ତେଣୁ ଆମେରିକା ଏହାକୁ ଦଖଲ କରିବାକୁ ଚାହୁଁଛି। ଏବେ ଯଦି ଆମେରିକା ଏହାକୁ ଦଖଲ କରେ, ତେବେ ନାଟୋରେ ହେବ ଫାଟ। ୟୁରୋପୀୟ ସହଯୋଗୀ ଆମେରିକାର ଦାଦାଗିରିକୁ ସହ୍ୟ କରିବେ ନାହିଁ ବୋଲି କହିଛନ୍ତି।
