କୁଆଖିଆ ବ୍ରିଜ ଉପରେ ଓଲଟିଲା କଦଳୀ ବୋଝେଇ ଟ୍ରକ: ୨ ମୃତ ଓ ଜଣେ ଗୁରୁତର

ଯାଜପୁର: ୧୬ନଂ ଜାତୀୟ ରାଜପଥର ଯାଜପୁର କୁଆଖିଆ ଫ୍ଲାଇଓଭର ଉପରେ ମର୍ମନ୍ତୁଦ ସଡ଼କ ଦୁର୍ଘଟଣା । କଦଳୀ ବୋଝେଇ ଟ୍ରକ ସହ ଅନ୍ୟ ଏକ ଟ୍ରକର ମୁହାଁମୁହିଁ ଧକ୍କା। ଫଳରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି।

ଆହତଙ୍କୁ ପ୍ରଥମେ ଧର୍ମଶାଳା ମେଡିକାଲରେ ପ୍ରାଥମିକ ଚିକିତ୍ସା କରାଯାଇ ପରେ କଟକ ମେଡିକାଲକୁ ସ୍ଥାନାନ୍ତର କରାଯାଇଛି । ସୂଚନା ଅନୁଯାୟୀ ଆନ୍ଧ୍ରରୁ ରାଞ୍ଚି ଅଭିମୁଖେ ଯାଉଥିବା କଦଳୀ ବୋଝେଇ ଟ୍ରକ କୌଣସି କାରଣରୁ ଭାରସାମ୍ୟ ହରାଇ ଓଲଟିଥିଲା । ଫଳରେ ପାର୍ଶ୍ୱରେ ଯାଉଥିବା ଏକ ଟ୍ରକକୁ ଧକ୍କା ହୋଇଥିଲା ।

ଏହି କଦଳୀ ବୋଝେଇ ଟ୍ରକରେ ଡ୍ରାଇଭର ଓ ହେଲପରଙ୍କ ସମେତ ଅନ୍ୟ ଜଣେ ଯୁବକ ଥିଲେ । ତେବେ ଦୁର୍ଘଟଣାରେ ଘଟଣାସ୍ଥଳରେ ଯୁବକଙ୍କ ମୃତ୍ୟୁ ଘଟିଥିବା ବେଳେ ଗୁରୁତର ଅବସ୍ଥାରେ ଉଭୟ ଡ୍ରାଇଭର ଓ ହେଲପରଙ୍କୁ ଧର୍ମଶାଳା ମେଡିକାଲରେ ଭର୍ତ୍ତି କରାଯାଇଥିଲା। ତେବେ ସେଠାରେ ଗାଡିର ହେଲପରର ମୃତ୍ୟୁ ଘଟିଛି।

ମୃତ ହେଲପର ଜଣଙ୍କ ଟାଟା ଜାମସେଦପୁର ଗରିବନବାଜ ଅଞ୍ଚଳର ଏସ.କେ ରାଜୁ ବୋଲି ଜଣାପଡିଛି। ଗୁରୁତର ଆହତ ହୋଇଥିବା ଡ୍ରାଇଭର ମହମ୍ମଦ ହାପିଜଙ୍କୁ କଟକ ମେଡିକାଲକୁ  ସ୍ଥାନାନ୍ତର କରାଯାଇଛି। ଖବର ପାଇ ଘଟଣାସ୍ଥଳରେ କୁଆଖିଆ ପୋଲିସ ପହଞ୍ଚି ତଦନ୍ତ ଚଳାଇଛି। ତେବେ କଦଳୀ ବୋଝେଇ ଗାଡ଼ିରେ ମୃତ ଯୁବକ ଜଣକ ଲିଫ୍ଟ ଅବା ଭଡା ଦେଇ ଆସିଥିବା ବେଳେ ତାଙ୍କ ପରିଚୟ ମିଳିପାରିନାହିଁ।