ଭାରତରେ କରୋନାର ତ୍ରିପଲ୍ ମ୍ୟୁଣ୍ଟେଟ୍ ଭାଇରସ୍  

ନୂଆଦିଲ୍ଲୀ: ଭାରତରେ କରୋନା ଭାଇରସର ନୂଆ ରୂପ ମିଳିଛି । ଏହା ତ୍ରିପଲ୍ ମ୍ୟୁଣ୍ଟେଟ ବୋଲି କୁହାଯାଉଛି । ଦେଶରେ କରୋନା ଭାଇରସର ସଂଗୀତ ସ୍ଥିତି ଥିବାବେଳେ ମହାରାଷ୍ଟ୍ରରେ ହୋଇଥିବା ଜିନୋମ ସିକ୍ୱେସିଂରୁ ଜଣାପଡ଼ିଛି ମୋଟ ମାମଲାର ୬୦ ପ୍ରତିଶତ ନୂଆ କରୋନା ଭାଇରସ୍ । ଏହାର ନାମ B.1.618 ଭ୍ୟାରିଏଣ୍ଟ । ଏହା ପୂର୍ବରୁ ଡବଲ୍ ମ୍ୟୁଣ୍ଟେଟ୍ କରୋନା ଭାଇରସ୍ ଆସିଥିଲା । ଯାହାର ନାଁ B.1,617 ଥିଲା ।

ନୂଆ ତ୍ରିପଲ୍ ମ୍ୟୁଣ୍ଟେଟ୍ କରୋନା ଭାଇରସରେ ନୂଆ ଜେନେଟିକ୍ ସେଟ୍ ଅଛି । ଏଥିରେ E484K ଭ୍ୟାରିଏଣ୍ଟର ଅଂଶ ରହିଛି । ନୂଆ ତ୍ରିପଲ୍ ମ୍ୟୁଣ୍ଟେଟ୍ ଶରୀରର ରୋଗ ପ୍ରତିଶେଧକ ଶକ୍ତି ନଷ୍ଟ କରୁଛି । ଏହାଛଡ଼ା ପୂର୍ବରୁ କରୋନା ସଂକ୍ରମିତ ହୋଇ ସୁସ୍ଥ ହୋଇଥିବା ଲୋକ ଦେହରେ ଥିବା ଆଣ୍ଟିବଡିକୁ ଏହା ନଷ୍ଟ କରି ଦେଉଥିବା ଜଣାପଡ଼ିଛି ।

ବୈଜ୍ଞାନିକଙ୍କ ଅନୁସାରେ, ପଶ୍ଚିମବଙ୍ଗରେ B.1.618 ଦ୍ରୁତଗତିରେ ବ୍ୟାପୁଛି । ପଶ୍ଚିମବଙ୍ଗରେ ଏହି ଭୂତାଣରୁ ସିକ୍ୱେନ୍ସ ମିଳିଛି । B.1.618 ଭ୍ୟାରିଏଣ୍ଟ ସହ ମେଳ ଖାଉଥିବା ଭାଇରସ୍ ଆମେରିକା, ସ୍ୱିଜରଲ୍ୟାଣ୍ଡ, ସିଙ୍ଗାପୁର ଓ ଫିନଲ୍ୟାଣ୍ଡରେ ମିଳିଛି । ଦୁନିଆରେ ଏହି ଭାରିଏଣ୍ଟରେ ସଂକ୍ରମିତଙ୍କ ମଧ୍ୟରୁ ଭାରତରେ ୬୨.୫ ପ୍ରତିଶତ ଲୋକ ଅଛନ୍ତି ।

ତେବେ, ଏହି ନୂଆ ଭାଇରସ୍ ସମ୍ପର୍କରେ ଅଧିକ ସୂଚନା ମିଳିନାହିଁ । ଏହା କେତେ ମାତ୍ରାରେ ସଂକ୍ରମଣ କରୁଛି, କୌଣସି ଭ୍ୟାକ୍ସିନ୍ କାମ କରିବ ନା ନାହିଁ । ସେନେଇ କିଛି ଜଣାପଡ଼ି ନାହିଁ । ଅନ୍ୟପଟେ ଦେଶୀ ଟିକା କୋଭାକ୍ସିନ୍ ତୃତୀୟ ପର୍ଯ୍ୟାୟ ଟ୍ରାଏଲର ଡାଟା ଜାରି କରିଛି । କରୋନାର ଦ୍ୱିତୀୟ ପ୍ରବାହରେ ଆତଙ୍କ ସୃଷ୍ଟି କରିଥିବା ଡବଲ ମ୍ୟୁଣ୍ଟେଟ୍ ଷ୍ଟ୍ରେନ୍ ଉପରେ ପ୍ରଭାବୀ ଥିବା ଜଣାପଡ଼ିଛି ।

କୋଭାକ୍ସିନର ଅନ୍ତରୀଣ ତଥ୍ୟ ଅନୁସାରେ ଟିକାର କ୍ଲିନିକାଲ ଭାବେ ୭୮ ପ୍ରତିଶତ ପ୍ରଭାବୀ ହୋଇଥିବା ବେଳେ ଗୁରୁତର କରୋନା ରୋଗୀଙ୍କ କ୍ଷେତ୍ରରେ ଶହେ ପ୍ରତିଶତ କାର୍ଯ୍ୟ କରୁଛି ।