୬ ରାଜ୍ୟରେ ଟର୍ଣ୍ଣାଡୋ ତାଣ୍ଡବ, ୧୦୦ରୁ ଅଧିକ ଲୋକ ମୃତ
ୱାଂଶିଟନ୍: ପ୍ରକୃତିର ପ୍ରଳୟ ଆଗରେ ଦୁନିଆର ଶକ୍ତିଶାଳୀ ରାଷ୍ଟ୍ର ଆମେରିକା ଅସହାୟ । ଆମେରିକାରେ ତାଣ୍ଡବ ରଚିଛି ଘୂର୍ଣ୍ଣିଝଡ଼ ଟର୍ଣ୍ଣାଡୋ । ଟର୍ଣ୍ଣାଡୋ ପ୍ରଭାବରେ ଘଣ୍ଟାପ୍ରତି ୩୨୦ କିଲୋମିଟର ବେଗରେ ପବନ ବହିବା ସହ ଆମେରିକାର ୬ ରାଜ୍ୟରେ ବ୍ୟାପକ କ୍ଷୟକ୍ଷତି ଘଟାଇଛି । ୧୦୦ ଜଣଙ୍କ ମୃତ୍ୟୁ ହୋଇଥିବା ବେଳେ ଅଧିକ କ୍ଷତିଗ୍ରସ୍ତ ହୋଇଛି କେଣ୍ଟୁକି ରାଜ୍ୟ । କେଣ୍ଟୁକିରେ ଘର ଗୁଡ଼ିକ ଭାଙ୍ଗି ଯାଇଥିବା ବେଳେ ବେଘର ହୋଇ ଯାଇଛନ୍ତି ହଜାର ହଜାର ଲୋକ ।
ରିପୋର୍ଟ ଅନୁସାରେ, ମେଫିଲ୍ଡରେ ମହମବତୀ କାରଖାନାକୁ ଉଡ଼ାଉ ଦେଇଛି । ଘୂର୍ଣ୍ଣିଝଡ଼ ସମୟରେ କାରାଖାନାରେ ଶହେରୁ ଅଧିକ କର୍ମଚାରୀ କାମ କରୁଥିଲେ । ଏବେବି ସେଠାରେ ଉଦ୍ଧାର କାର୍ଯ୍ୟ ଜାରି ରହିଛି । ଆମେରିକା ଇତିହାସରେ ଏହା ସବୁଠୁ ପ୍ରଳୟଙ୍କାରୀ ଝଡ଼ ଥିବା କହିଛନ୍ତି ରାଷ୍ଟ୍ରପତି ଜୋ ବାଇଡେନ୍ । କେଣ୍ଟୁକି ଗଭର୍ଣ୍ଣର ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି ।
କେଣ୍ଟୁକି ଗଭର୍ଣ୍ଣର ଏଣ୍ଡି ବେସିୟର ଘୂର୍ଣ୍ଣିଝଡ଼କୁ ସବୁଠୁ ଭୟଙ୍କର କହିଛନ୍ତି । ଏବେବି ରାଜ୍ୟର ଅନେକ ସ୍ଥାନରେ କୋଠାର ଭଂଗ୍ନାଶ ତଳେ ଲୋକେ ଫସି ରହିଛନ୍ତି । ମୃତକଙ୍କ ସଂଖ୍ୟା ଆହୁରି ବଢ଼ିବା ଆଶଙ୍କା କରାଯାଉଛି । କେଣ୍ଟୁକିରେ ୨ ଲକ୍ଷରୁ ଅଧିକ ଲୋକଙ୍କ ଅନ୍ଧାରରେ ଅଛନ୍ତି । ଏବେ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ଆହାତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।
