ଆଜି ୧୨ ଘଣ୍ଟିଆ ଭବାନୀପାଟଣା ବନ୍ଦ, ଧାନ ମଣ୍ଡି ଅବ୍ୟବସ୍ଥା ପ୍ରତିବାଦରେ କଂଗ୍ରେସର ବନ୍ଦ ଡାକରା

ଭବାନୀପାଟଣା : ଆଜି ୧୨ ଘଣ୍ଟିଆ ଭବାନୀପାଟଣା ବନ୍ଦ ପାଳନ କରୁଛି କଂଗ୍ରେସ। ଧାନ ମଣ୍ଡିରେ ଅବ୍ୟବସ୍ଥା ଓ କଟନୀ ଛଟନୀ ପ୍ରତିବାଦରେ ଏହି ବନ୍ଦ ପାଳନ କରାଯାଉଛି। ବନ୍ଦ ରହିଛି ସମସ୍ତ ଦୋକାନ ବଜାର, ଗାଡ଼ି ଚଳାଚଳ। ସରକାରୀ ଓ ବେସରକାରୀ ଅଫିସ ବି ବନ୍ଦ ରହିଛି। ପିକେଟିଂ କରୁଛନ୍ତି କଂଗ୍ରେସ କର୍ମୀ। ବନ୍ଦ ଯୋଗୁଁ ବରଗଡ଼- ବରିଗୁମା ଜାତୀୟ ରାଜପଥ ୨୬ କୁ କେସିଙ୍ଗା ଓ ଉତ୍କେଲା ନିକଟରେ ଅବରୋଧ କରିଛନ୍ତି କଂଗ୍ରେସ କର୍ମୀ।

ଭବାନୀ ପାଟଣା- ରାୟପୁର ରାସ୍ତାକୁ ମଧ୍ଯ ବୋର୍ଡ଼ା ଓ କର୍ଲାପଡା ନିକଟରେ ଅବରୋଧ କରିଛନ୍ତି। ରାସ୍ତା ଉପରେ ଧାନ ବସ୍ତା ରଖି ଅବରୋଧ କରାଯାଉଛି। ଏହା ଦ୍ଵାରା ଗାଡ଼ି ଚଳାଚଳ ପ୍ରଭାବିତ ହୋଇଛି। ମଣ୍ଡି ବ୍ୟବସ୍ଥାକୁ ସଜାଡ଼ିବା ସହିତ ତୁରନ୍ତ ଚାଷୀଙ୍କୁ ସବୁ ସୁବିଧା ଯୋଗାଇ ଦେବାକୁ ଦାବି କରିଛି କଂଗ୍ରେସ। ଯଦି ସମସ୍ୟାର ସମାଧାନ ନହୁଏ, ତାହେଲେ ଆଗକୁ ଆନ୍ଦୋଳନ ଜୋରଦାର କରିବାକୁ ଚେତାବନୀ ଦିଆଯାଇଛି।