ନନ୍ଦିଘୋଷ ବ୍ୟୁରୋ: ସଦଗୁରୁ ଜଗଦୀଶ ବାସୁଦେବଙ୍କୁ ମିଳିଲା ଆଶ୍ବସ୍ତି। ସଦଗୁରୁଙ୍କ ଦ୍ବାରା ପରିଚାଳିତ କୋଏମ୍ବାଟୁରସ୍ଥିତ ଇଶା ଫାଉଣ୍ଡେସନ ବିରୋଧରେ ଆସିଥିବା ଅଭିଯୋଗ ମାମଲାକୁ ବନ୍ଦ କରିଛନ୍ତି ସୁପ୍ରିମକୋର୍ଟ। ଫାଉଣ୍ଡେସନରେ ଦୁଇ ମହିଳା ଭକ୍ତ କୌଣସି ଚାପ ବିନା ସ୍ବେଚ୍ଛାକୃତ ଭାବେ ସାମିଲ ହୋଇଛନ୍ତି ବୋଲି କହିବା ପରେ ସୁପ୍ରିମକୋର୍ଟ ମାମଲାକୁ ବନ୍ଦ କରିଛନ୍ତି। ଦୁଇ ମହିଳା ଭକ୍ତଙ୍କ ପିତାମାତାଙ୍କ ପକ୍ଷରୁ ସଦଗୁରୁଙ୍କ ବିରୋଧରେ ସୁପ୍ରିମକୋର୍ଟରେ ଦାୟର ହୋଇଥିଲା ମାମଲା। ଏହି ମାମଲାର ଶୁଣାଣି କରି ସିଜେଆଇ ଡି.ୱାଇ. ଚନ୍ଦ୍ରଚୂଡ଼ କହିଛନ୍ତି- ଦୁଇ ମହିଳାଙ୍କର ବୟସ ଯଥାକ୍ରମେ ୨୪ ଓ ୨୭ ବର୍ଷ। ସେମାନେ ଫାଉଣ୍ଡେସନରେ ସ୍ବେଚ୍ଛାକୃତ ଭାବେ ଯୋଗଦେଇଥିଲେ।
ପୂର୍ବରୁ ସଦଗୁରୁଙ୍କ ଦ୍ବାରା ପରିଚାଳିତ ଇଶା ଫାଉଣ୍ଡେସନ ବିରୋଧରେ ପୋଲିସ ତଦନ୍ତ ଲାଗି ମାଡ୍ରାସ ହାଇକୋର୍ଟ ଦେଇଥିବା ନିର୍ଦ୍ଦେଶ ଉପରେ ରୋକ ଲଗାଇଥିଲେ ସୁପ୍ରିମକୋର୍ଟ। ଏକ ଷ୍ଟାଟସ ରିପୋର୍ଟ ଦାଖଲ ଲାଗି ପୋଲିସକୁ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ। କୋଏମ୍ବାଟୁରସ୍ଥିତ ଆଶ୍ରମରେ ଶତାଧିକ ପୋଲିସ ପ୍ରବେଶ କରିବା ପରେ ମାମଲା ପହଞ୍ଚିଥିଲା ସୁପ୍ରିମକୋର୍ଟରେ।
