ଲିକ୍ ହୋଇଛି କି କୋ-ୱିନ୍ ଡାଟା ? TMC ପ୍ରବକ୍ତା କଲେ ଏମିତି ଟ୍ବିଟ

ନୂଆଦିଲ୍ଲୀ: ଲିକ୍ ହୋଇଛି କି କୋ-ଓ୍ବିନ୍ ପୋର୍ଟାଲର ଡାଟା ? ଏହି ପୋର୍ଟାଲର ଡାଟା ଲିକ୍ ହୋଇଥିବା ଦାବି କରୁଛନ୍ତି TMC ପ୍ରବକ୍ତା ସକେତ ଗୋଖଲେ । ସେ ଦାବି କରିଛନ୍ତି, କରୋନା ସମୟରେ କେନ୍ଦ୍ର ସରକାରଙ୍କ ଦ୍ବାରା ତିଆରି କରାଯାଇଥିବା ଓ୍ବେବ୍ ପୋର୍ଟାଲ କୋ-ଓ୍ବିନ୍ର ଡାଟା ଲିକ୍ ହୋଇଛି ।
ଏହି ଲିକ୍ ଡାଟାରେ ସାଧାରଣ ଜନତାଙ୍କ ସହ ବଡ଼ ବଡ଼ ନେତା, ଅଫିସର୍ ଏବଂ ସାମ୍ବାଦିକଙ୍କ ନାଁ ରହିଛି ।

ସକେତ ଗୋଖଲେ ନିଜ ଟ୍ବିଟର ଆକାଉଣ୍ଟରେ ଏଭଳି ଲିକ୍ ହୋଇଥିବା ତଥ୍ୟ ସେୟାର କରିଛନ୍ତି । ଯେଉଁଥିରେ ଲୋକଙ୍କ ନାମ, ଠିକଣା, ଆଧାର ନମ୍ବର ଇତ୍ୟାଦି ରହିଛି ।

ଗୋଖଲେଙ୍କ ଏହି ଟ୍ବିଟକୁ ନେଇ କେନ୍ଦ୍ରସରକାରଙ୍କ ସୂଚନା ମନ୍ତ୍ରଣାଳୟ ଜବାବ ରଖିଛି । ମନ୍ତ୍ରଣାଳୟ କହିଛି ଏହା ପୂରୁଣା ଡାଟା । ଏହି ଡାଟାର ଏବେ ଯାଞ୍ଚ ଚାଲିଛି । ଏହା କୋ-ଓ୍ବିନରୁ ଲିକ୍ ହୋଇଛି କି ଅନ୍ୟ କେଉଁଠୁ ତାହା ଏବେ ଯାଞ୍ଚ କରାଯାଉଛି । ଏ ନେଇ ପୋର୍ଟାଲ ଅଧିକାରୀଙ୍କଠାରୁ ରିପୋର୍ଟ ମଗାଯାଇଛି ।

ଲିକ୍ ହୋଇଥିବା ଡାଟାରେ ରାଜସ୍ଥାନ ସାଂସଦ , ଟିଏମସି ନେତା, ପୂର୍ବ କେନ୍ଦ୍ରମନ୍ତ୍ରୀ, କଂଗ୍ରେସ ନେତାଙ୍କ ନାମ ରହିଛି । ଏବେ ନୁହେଁ ୨୦୨୧ ଏବଂ ୨୨ରେ ମଧ୍ୟ କୋ-ଓ୍ବିନ୍ ପୋର୍ଟାଲରୁ ଲୋକଙ୍କ ଡାଟା ଲିକ୍ ହୋଇଥିବା କୁହାଯାଇଥିଲା  ।