ଟାଇଟାନିକ ଦେଖିବାକୁ ଯାଇ ବୁଡ଼ା ଜାହାଜ ନିଖୋଜ , ୪ଦିନ ହେଲା ଟ୍ରାକ୍ କରିପାରୁନି ଏକ୍ସପର୍ଟ ଟିମ୍

ନୂଆଦିଲ୍ଲୀ : ଆଣ୍ଟଲାଣ୍ଟିକରେ ଟୁରିଷ୍ଟ ବୁଡା ଜାହାଜ ନିଖୋଜ। ୪ ଦିନ ହେଲେ ବୁଡ଼ା ଜାହାଜ ନିଖୋଜ ଥିବା ବେଳେ ତମାମ ପ୍ରଚେଷ୍ଟା ସତ୍ତ୍ବେ ଏହାକୁ ଟ୍ରାକ କରାଯାଇନାରୁନାହିଁ । ଜାହାଜର ପତ୍ତା ମିଳୁ ନଥିବା ବେଳେ କେଉଁ ସ୍ଥାନରୁ ଜାହାଜ ଗାଏବ ହୋଇଛି ତାହା ମଧ୍ୟ ଜଣାପଡ଼ିନି । ଆମେରିକୀୟ କମ୍ପାନୀ ଓସିଆନ ଗେଟ ପକ୍ଷରୁ ଏହି ଟ୍ରିପର ଆୟୋଜନ କରାଯାଇଥିବା ବେଳେ ଜଣେ ଯାତ୍ରୀଙ୍କଠାରୁ ୨ କୋଟିରୁ ଅଧିକ ଟଙ୍କା ନିଆଯାଇଛି । ଜାହାଜରେ ଜଣେ ପାଇଲଟ, ଜଣେ ଏକ୍ସପର୍ଟ ଓ ୩ଜଣ ଯାତ୍ରୀ ରହିଛନ୍ତି । ରବିବାରଠାରୁ ବୁଡ଼ାଜାହାଜ ସମୁଦ୍ରରେ ନିଖୋଜ ହୋଇଯାଇଥିଲେ ବି ଏଯାଏଁ ଜାହାଜକୁ ଟ୍ରାକ କରାଯାଇପାରିନାହିଁ । ଜାହାଜକୁ ଟ୍ରାକ କରିବାକୁ ରେସ୍କ୍ୟୁ ଅପରେସନ ଜାରି ରହିଛି ।

ସେମାନଙ୍କୁ ଟ୍ରାକ କରିବାକୁ ସବୁ ପ୍ରକାର ଚେଷ୍ଟା କରାଯାଉଛି ବୋଲି ଜାହାଜ ନିର୍ମାଣକାରୀ କମ୍ପାନୀ ପକ୍ଷରୁ କୁହାଯାଉଛି । ବୁଡ଼ାଜାହାଜରେ ଯେତିକି ଅମ୍ଳଜାନ ଅଛି ତାହା ବ୍ୟବହାର କରି ସେଥିରେ ଥିବା ଲୋକମାନେ ୭୦ରୁ ୯୬ ଘଣ୍ଟା ପର୍ଯ୍ୟନ୍ତ ବଞ୍ଚିଯାଇପାରିବେ । ଅଧିକ ଡେରି ହେଲେ ସେମାନଙ୍କ ଜୀବନରକ୍ଷା ସମ୍ଭବ ହୋଇପାରିବ ନାହିଁ । ୨୧ ଫୁଟର ବୁଡ଼ାଜାହାଜରେ ସର୍ବାଧିକ ଚାରିଦିନ ଅମ୍ଳଜାନ ଯୋଗାଇବାର କ୍ଷମତା ରହିଛି ବୋଲି ଉଦ୍ଧାରକାରୀ ଦଳର ମୁଖ୍ୟ କହିଛନ୍ତି ।

ଜାହାଜ କର୍ମଚାରୀ ତଥା ଆମେରିକା ଓ କାନାଡ଼ାର ତଟରକ୍ଷୀମାନେ କେପ୍ କଡ୍ର ୯୦୦ ମାଇଲ ଦୂର ସମୁଦ୍ର ଭିତରେ ଖୋଜାଖୋଜି କରୁଛନ୍ତି । ୧୩,୦୦୦ ଫୁଟ୍ ଗଭୀର ସମୁଦ୍ର ତଳୁ କିଛି ଶବ୍ଦ ଶୁଣିବା ପାଇଁ ସେମାନେ ସୋନାର ପ୍ରଯୁକ୍ତି ବ୍ୟବହାର କରୁଛନ୍ତି । କାନାଡାର ପି-୮ ଏୟାରକାଫ୍ଟ ରେସ୍କ୍ୟୁ ଅପରେସନରେ ସାମିଲ ହୋଇଛି । ଉକ୍ତ ୫ ଜଣ ଲୋକଙ୍କ ଭିତରେ ଜଣେ ବ୍ରିଟିସ ଅରବପତି ହାମିସ ହାର୍ଡିଂ ଅଛନ୍ତି। ୧୯୧୨ ମସିହାରେ ଉତ୍ତର ଆଣ୍ଟଲାଣ୍ଟିକ ମହାସାଗରରେ ଟାଇଟାନିକ ବୁଡ଼ି ଯାଇଥିଲା । ଏହି ଦୁର୍ଘଟଣାରେ ୧୫ଶହ ଲୋକଙ୍କ ମୃତ୍ୟୁ ହୋଇଥିଲା ।