ଆଟଲାଣ୍ଟିକରେ ଆଡଭେଞ୍ଚର ମିଶନ ଫେଲ୍, ଜଳଯାତ୍ରା ପାଲଟିଲା ଶେଷଯାତ୍ରା
1 min read
ନୂଆଦିଲ୍ଲୀ : ବୁଡ଼ିଗଲା ଟାଇଟନ ଟୁରିଜିମ ବୁଡ଼ାଜାହଜ । ଆଟଲାଣ୍ଟିକରେ ଆଡଭେଞ୍ଚର ମିଶନ ଫେଲ୍ । ସମୁଦ୍ର ଭିତରେ ବିସ୍ଫୋରଣ ପରେ ଓସେନ ଗେଟ ସବ୍-ମେରିନରେ ଯାଇଥିବା ୫ଯାତ୍ରୀଙ୍କର ମୃତ୍ୟୁ ହୋଇଛି । ବୁଡ଼ା ଜାହାଜରେ ଜଣେ ପାଇଲଟଙ୍କ ସମେତ ୪ଜଣ ଆରବପତି ଟାଇଟାନିକ ଟୁରରେ ଯାଇଥିଲେ ।
ଗଭୀର ସମୁଦ୍ରରୁ ସବ-ମେରିନର ଧ୍ବଂସାବଶେଷ ଠାବ ହେବା ପରେ ସମସ୍ତ ଯାତ୍ରୀଙ୍କ ମୃତ୍ୟୁ ଘଟିଥିବା କହିଛି ଆମେରିକା କୋଷ୍ଟ ଗାର୍ଡ । ବ୍ରିଟିଶ ଆରବପତି ହାମିଶ ହାର୍ଡିଂ, ପାକିସ୍ତାନୀ ଆରବପତି ଶେହଜାଦ ଦାଉଦ, ତାଙ୍କ ପୁଅ ସୁଲେମାନ, ଫ୍ରେଞ୍ଚ ଏକ୍ସପ୍ଲୋରର ପଲ୍ ହେନେରୀ ନାର୍ଗୋଲେଟଙ୍କର ମୃତ୍ୟୁହୋଇଛି । ଟାଇଟାନିକ ବୁଡିଥିବା ସ୍ଥାନରୁ ୧୬୦୦ ଫୁଟ ବା ୪୮୮ ମିଟର ଦୂରରେ ସବମେରିନ ଟାଇଟନର ଧ୍ବଂସାବଶେଷ ଠାବ ହୋଇଛି । ୧୩ହଜାର ଫୁଟ ଗଭୀରରେ ଥିବା ଟାଇଟାନିକର ଭଗ୍ନାଂଶ ଦେଖିବାକୁ ଟୁରିଜିମ ସଂସ୍ଥା ପକ୍ଷରୁ ଟୁରର ଆୟୋଜନ କରାଯାଇଥିଲା । ଏଥିପାଇଁ ପ୍ରତ୍ୟେକ ଯାତ୍ରୀଙ୍କଠାରୁ ୨କୋଟି ଲେଖାଏଁ ଟଙ୍କା ନେଇଥିଲା କମ୍ପାନୀ ।
ଜୁନ ୧୮ ତାରିଖରେ ବୁଡାଜାହାଜ ଯାତ୍ରା ଆରମ୍ଭ କରିଥିବା ବେଳେ ଦେଢ଼ ଘଣ୍ଟା ପରେ ଏହା ରାଡାର ବାହାରକୁ ଚାଲିଯାଇଥିଲା । ଗତ ୫୦ବର୍ଷରେ ଏଭଳି ଘଟଣା ଘଟି ନଥିବା ବେଳେ ଦୁର୍ଘଟଣାଗ୍ରସ୍ତ ହୋଇଥିବା ସବ୍-ମରିନ ସବୁଠୁ ସୁରକ୍ଷିତ ଓ ଅତ୍ୟାଧୁନିକ ଟେକ୍ନୋଲୋଜିରେ ନିର୍ମାଣ କରାଯାଇଥିବା କମ୍ପାନୀ ପକ୍ଷରୁ କୁହାଯାଇଛି ।
