ମେଡିକାଲ ଆଣିଥିଲେ, ମରିଯିବାରୁ ଶବ ଛାଡ଼ି ଚାଲିଗଲେ
1 min read
ସମ୍ବଲପୁର: ପୁଣି ସାମନାକୁ ଆସିଛି ବୁର୍ଲା ଭୀମସାର ମେଡିକାଲ କର୍ତ୍ତୃପକ୍ଷଙ୍କ ଖାମଖିଆଲି । ସମାନ ଉପକରଣରେ ଏଡସ୍ ଆକ୍ରାନ୍ତଙ୍କ ସହ ଅନ୍ୟ ରୋଗୀଙ୍କ ଦାନ୍ତ ଅପରେସନ୍ ଘଟଣା ମନରୁ ଲିଭିନି । ଆଉ ଆଜି ସେହି ବୁର୍ଲା ଭୀମସାରରେ ଦେଖିବାକୁ ମିଳିଛି ମାନବିକତାକୁ ଉପହାସ କଲା ଭଳି ଘଟଣା । ଚିକିତ୍ସାଧୀନ ଅବସ୍ଥାରେ ଏଡସ ଆକ୍ରାନ୍ତଙ୍କ ମୃତ୍ୟୁର ୧୨ ଘଣ୍ଟା ପରେ ବି ବେଡରେ ମୃତଦେହ ପଡ଼ି ରହିଛି । ମେଡିସିନ ୱାର୍ଡ ବେଡରେ ଶବ ପଡ଼ି ରହିଥିଲେ ବି କର୍ତ୍ତୃପକ୍ଷଙ୍କ ନିଘା ନାହିଁ । ଅନ୍ୟପଟେ ସଂକ୍ରମଣ ଆଶଙ୍କା କରିଛନ୍ତି ୱାର୍ଡରେ ଥିବା ଅନ୍ୟ ରୋଗୀ ଓ ସମ୍ପର୍କୀୟ ।
ଆଖିରେ ସମସ୍ୟା ପାଇଁ ଗତ ୨୩ ତାରିଖରେ ବୁର୍ଲା ଭୀମସାରରେ ଭର୍ତ୍ତି ହୋଇଥିଲେ ଏଡସ୍ ଆକ୍ରାନ୍ତ । ଡାହାଣ ଆଖି ଅପରେସନ୍ ହେଲା । ତା’ପରେ ତାଙ୍କୁ ମେଡିସିନ୍ ୱାର୍ଡରେ ଭର୍ତ୍ତି କରାଯାଇଥିଲା । ଆଜି ସକାଳ ପ୍ରାୟ ୯ଟା ସମୟରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ତେବେ, ବିଡ଼ମ୍ବନାର ବିଷୟ ମରିଗଲା ପରେ ମୃତଦେହକୁ ଛାଡ଼ି ଚାଲି ଯାଇଛନ୍ତି ସହାୟକ । ମୃତ୍ୟୁର ୧୨ ଘଣ୍ଟା ପରେ ବି ମେଡିସିନ୍ ୱାର୍ଡର ୨ ନମ୍ବର ୟୁନିଟର ବେଡ୍ ଉପରେ ମୃତଦେହ ପଡ଼ି ରହିଛି ।
ସହାୟକ ଶବ ଛାଡ଼ି ପଳାଇଥିବା ବେଳେ ମେଡିକାଲ କର୍ତ୍ତୃପକ୍ଷ ବି ବେଫିକର ହୋଇ ବସି ରହିଛନ୍ତି । ଏଡସ୍ ଆକ୍ରାନ୍ତ ସତ୍ତ୍ୱେ ମୃତଦେହକୁ ମେଡିସିନ୍ ୱାର୍ଡରୁ ଅନ୍ୟତ୍ର ସ୍ଥାନାନ୍ତର କରାଯାଇନାହିଁ । ତେବେ, ମୃତକ ଏଡସ୍ ଆକ୍ରାନ୍ତ ହୋଇଥିବାରୁ ୱାର୍ଡରେ ଥିବା ଅନ୍ୟ ରୋଗୀ ଓ ସମ୍ପର୍କୀୟ ଭୟଭୀତ ହୋଇ ପଡ଼ିଛନ୍ତି ।
')}
