୨୦୨୨ରେ ଏକାଠି ହେବ ବାଘ ଓ ହାତୀ ଗଣନା

ଭୁବନେଶ୍ୱର: ମେ’ ମାସରେ ହାତୀ ଗଣନା ଓ ଡିସେମ୍ବରରୁ ଜାନୁଆରୀ ଭିତରେ ବାଘ ଗଣନା। ୭୦ ଦଶକ ପରଠାରୁ ଏମିତି ହେଉଥିଲା ବାଘ ଓ ହାତୀ ଗଣନା। ହେଲେ ଏବେ ବଦଳିବ ପଦ୍ଧତି। ଡିସେମ୍ବରରେ ଏକାଠି ହାତୀ ଓ ବାଘ ଗଣନା କରିବାକୁ ପ୍ରସ୍ତାବ ଦେଇଛନ୍ତି କେନ୍ଦ୍ର ସରକାର। ହେଲେ ଏଯାଏ ଏକାଠି ଗଣନାର ପଦ୍ଧତି ବାହାରି ପାରିନାହିଁ। ୨୦୧୭ ଗଣନା ଅନୁସାରେ, ରାଜ୍ୟରେ ୧୯୭୬ ହାତୀ ଥିଲେ। ସେହିପରି ୨୦୧୮ ଗଣନାରେ ବାଘ ସଂଖ୍ୟା ୩୨ରୁ ୨୮କୁ ଖସିଥିଲା।

ଏଯାଏ ମେ’ ମାସ ଖରାଦିନରେ ହାତୀ ଗଣନା ହୋଇଆସୁଛି। କାରଣ ଖରାରେ ପାଣି ସନ୍ଧାନରେ ଗୋଟାଏ ସ୍ଥାନରେ ଏକାଠି ହୁଅନ୍ତି ହାତୀ ପଲ। ପୂର୍ବରୁ ନିୟୋଜିତ ବନ କର୍ମଚାରୀ, ସେମାନଙ୍କ ଗଣନା କରନ୍ତି। ଅନ୍ୟପଟେ ଥଣ୍ଡାରେ ଘଞ୍ଚ ବଣରେ ଅଧିକ ବାଟ ବୁଲେ ନାହିଁ ବାଘ। ପାଦ ଚିହ୍ନ ଓ କ୍ୟାମେରା ଟ୍ରାପିଂରେ ବାଘ ଗଣନା ହୁଏ। ହେଲେ ଥଣ୍ଡା ଦିନରେ ପାଣିର ଅଭାବ ନଥିବାରୁ ହାତୀ ଗୋଟାଏ ସ୍ଥାନରେ ଏକାଠି ହେବା କଷ୍ଟକର। ଯେଉଁଥି ପାଇଁ ଗଣନାରେ ସମସ୍ୟା ଉପୁଜିପାରେ।

ଜଙ୍ଗଲ ଭିତରେ ବୁଲୁଥିବା ସ୍ଥାନ ବାଘ ଓ ହାତୀଙ୍କ ୯୦ ପ୍ରତିଶତ ସମାନ। ତାକୁ ଭିତ୍ତି କରି ଗଣନା କଲେ ବି ସମସ୍ୟା ଦେଖା ଦେଇପାରେ। କାରଣ ବିଭିନ୍ନ ସମୟରେ ହାତୀ ପାଦ ତଳେ ବାଘ ପାଦ ଚିହ୍ନ ଲିଭିବାର ସମ୍ଭାବନା ରହିଛି।