ଓଡ଼ିଶାରେ ଏଣିକି ପ୍ରତି ବର୍ଷ ହେବ ବାଘ ଗଣନା

ଭୁବନେଶ୍ୱର: ଓଡ଼ିଶାରେ ଏଣିକି ପ୍ରତି ବର୍ଷ ହେବ ବାଘ ଗଣନା। କ୍ୟାମେରା ଟ୍ରାପ ଜରିଆରେ ବର୍ଷ ସାରା ମହାବଳ ବାଘଙ୍କ ସ୍ଥିତି ଉପରେ ରଖାଯିବ ନଜର । ଗତକାଲି ପ୍ରକାଶ ପାଇଥିବା ରାଜ୍ୟର ପ୍ରଥମ ବାଘ ଗଣନା ରିପୋର୍ଟରେ ରାଜ୍ୟରେ ୩୦ଟି ମହାବଳ ଓ ୮ଟି ଶାବକ ଥିବା ଜଣାପଡିଛି । ସେଥିରୁ ଶିମିଳିପାଳରେ ୨୭ଟି ମହାବଳ ବାଘ ସହ ୮ ଶାବକ ଥିବା ବେଳେ କେନ୍ଦୁଝର, ପାରଳାଖେମୁଣ୍ଡି ଓ ହୀରାକୁଦ ବନଖଣ୍ଡରେ ଗୋଟିଏ ଲେଖାଏଁ ମହାବଳଙ୍କ ଉପସ୍ଥିତି ସ୍ପଷ୍ଟ ହୋଇଛି।

ପ୍ରାଣୀ ପ୍ରେମୀଙ୍କ ଲାଗି ଖୁସି ଖବର। ଓଡ଼ିଶାରେ ବଢୁଛି ବାଘ ସଂଖ୍ୟା। ଶିମିଳିପାଳ ବ୍ୟତୀତ ହୀରାକୁଦ, ପାରଳାଖେମୁଣ୍ଡି ଓ କେନ୍ଦୁଝରରେ ବି ରହିଛି ବାଘଙ୍କ ଉପସ୍ଥିତି। ସାରା ବିଶ୍ୱରେ କେବଳ ଶିମିଳିପାଳରେ ଅଛନ୍ତି ୧୩ କଳା ବାଘ। ହଦଗଡ଼, କେନ୍ଦୁଝର ଓ କୁଲଡ଼ିହା ଅଭୟାରଣ୍ୟକୁ ନେଇ ବଢିବ ଶିମିଳିପାଳର କରିଡ଼ର।

୨୦୨୨ରେ ଏନଟିସିଏ ଦ୍ବାରା ହୋଇଥିବା ବାଘ ଗଣନାରେ ରାଜ୍ୟରେ ୨୦ଟି ବାଘ ଥିବା ବେଳେ ଏଥର ଏହା ୩୦କୁ ବୃଦ୍ଧି ପାଇଛି। ରାଜ୍ୟରେ ବାଘ ସଂଖ୍ୟା ବୃଦ୍ଧି ପାଉଥିବା ଉତ୍ସାହଜନକ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ବିଟ କରିଛନ୍ତି। ଶିମିଳିପାଳରେ ମୋଟ ୨୭ଟି ବାଘ ଥିବା ବେଳେ ଏଥିରୁ କଳାବାଘ ସଂଖ୍ୟା ୧୩। ଇନ୍ ବ୍ରିଡ଼ିଂ ଯୋଗୁଁ କଳା ବାଘଙ୍କ ସଂଖ୍ୟା ବଢ଼ୁଥିବା କହିଛନ୍ତି ବନ୍ୟପ୍ରାଣୀ ପିସିସିଏଫ୍। ଏହି ସମସ୍ୟାର ସମାଧାନ ପାଇଁ ଅନ୍ୟ ସ୍ଥାନରୁ ବାଘୁଣୀ ଆଣି ଶିମିଳିପାଳରେ ଛାଡ଼ିବାକୁ ଯୋଜନା ହୋଇଛି। ଏଥିପାଇଁ NTCA ଓ ୱାଇଲ୍ଡ ଲାଇଫ ଇନଷ୍ଟିଚ୍ୟଟ ଅଫ ଇଣ୍ଡିଆ ସହ ଯୋଗାଯୋଗ କରାଯାଇଛି।