ଲୁଚି ଖାଉଥିଲା କୁକୁଡା, ଯନ୍ତା ବସାଇବାରୁ ଧରାପଡିଲା
ମାଲକାନଗିରି: କୁକୁଡ଼ା ଖାଇବାକୁ ଆସି ଯନ୍ତାରେ ପଡ଼ିଲା ବାଘ । ବହୁଦିନ ଧରି କୁକୁଡା ଖାଉଥିବାରୁ ଯନ୍ତା ବସାଯାଇଥିଲା । ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ର କାଙ୍କେର ଜିଲ୍ଲା ଠେଲ୍କାବୋଡ଼ ଗାଁରେ ଏହି ଘଟଣା ଘଟିଛି । ଏକ କୁକୁଡ଼ା ଫାର୍ମରୁ ଗତ ୧୫ ଦିନ ହେଲା କୁକୁଡ଼ା ଗାଏବ୍ ହୋଇଯାଉଥିଲେ ।
କୌଣସି ଜଙ୍ଗଲୀ ଜନ୍ତୁ କୁକୁଡ଼ା ଖାଇ ଯାଉଥିବା ସନ୍ଦେହ କରି ଫାର୍ମ ମାଲିକ ବନ ବିଭାଗକୁ ଖବର ଦେଇଥିଲେ । ବନ ବିଭାଗ ପକ୍ଷରୁ ଫାର୍ମ ପାଖରେ ଏକ ଯନ୍ତା ବସାଯାଇଥିଲା । ପରେ ଦେଖିଲା ବେଳକୁ ସେହି ଯନ୍ତାରେ ଏକ ଚିତାବାଘ ପଡ଼ିଛି । ପୂର୍ବରୁ ମଧ୍ୟ ସେହି କୁକୁଡ଼ା ଫାର୍ମ ପାଖରେ ଏକ ଚିତାବାଘ ଯନ୍ତାରେ ପଡ଼ିଥିଲା ।
ତାକୁ ବନ ବିଭାଗ କର୍ମଚାରୀ ସେହି ପାଖ ଜଙ୍ଗଲରେ ଛାଡ଼ି ଦେଇଥିଲେ । କିନ୍ତୁ ବାଘଟି କୁକୁଡ଼ା ଲୋଭରେ ପୁଣି ଆସି ଯନ୍ତାରେ ପଡ଼ିଥିବା ଅନୁମାନ କରାଯାଉଛି । ଏଥର ବାଘଟିକୁ ଦୂରରେ, ଘଞ୍ଚ ଜଙ୍ଗଲରେ ଛଡ଼ାଯିବ ବୋଲି ବନ ଅଧିକାରୀ କହିଛନ୍ତି ।
