ଟିକା ନାଁରେ ଦେଲେ ବିଷ ଇଞ୍ଜେକ୍ସନ, ପରିବାରର ୩ ମୃତ
ଚେନ୍ନାଇ: କୋଭିଡ୍ ଟିକା ନାଁରେ ଦିଆଗଲା ବିଷ । ବିଷ କ୍ରିୟାରେ ପ୍ରାଣ ହରାଇଛନ୍ତି ଗୋଟିଏ ପରିବାରର ୩ ଜଣ ସଦସ୍ୟ । ଘଟଣା ଘଟିଛି ତାମିଲନାଡୁର ଇରୋଡରେ । ଏହି ଘଟଣାରେ ୨ ଜଣଙ୍କୁ ପୋଲିସ ଗିରଫ କରିଛି । ତଦନ୍ତରୁ ଜଣାପଡ଼ିଛି ଇରୋଡର କୀଜଭାନି ଗାଁର ଜଣେ ବ୍ୟକ୍ତି ତଥା ମୁଖ୍ୟ ଅଭିଯୁକ୍ତ ଆର.କଲ୍ୟାଣସୁନ୍ଦରମ ସ୍ଥାନୀୟ କାରୁନ୍ ଗୋନ୍ଦଭଲାସୁ ଗାଁର କାରୁପାନକୋରୁନ୍ଦରଙ୍କଠାରୁ ୧୫ ଲକ୍ଷ ଟଙ୍କା ଧାର ସୂତ୍ରରେ ନେଇଥିଲା । ପରେ ସେ ଟଙ୍କା ଦେବାକୁ ଅସମର୍ଥ ହେବା ସହ ଏହାକୁ ନେଇ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା ।
ଶେଷରେ କଲ୍ୟାଣସୁନ୍ଦରମ ଏକ ମନ୍ଦ ଉପାୟ ପାଞ୍ଚି ଉକ୍ତ ପରିବାରକୁ ସମୂଳ ନାଶ କରିଦେବା ଲାଗି ନିଷ୍ପତ୍ତି ନେଇଥିଲା ଓ ଏହି କାର୍ଯ୍ୟରେ ସାବରି ନାମକ ଜଣେ ଯୁବକଙ୍କ ସହାୟତା ନେଇଥିଲା । ସାବରି ଜଣେ ସ୍ୱାସ୍ଥ୍ୟକର୍ମୀ ଭାବେ ଯାଇ ସେମାନଙ୍କୁ କୋଭିଡ ଟିକା ନାଁରେ ବିଷ ମିଶ୍ରିତ ଇଞ୍ଜେକ୍ସନ୍ ଦେଇଥିଲା । ବିଶ୍ୱାସରେ ବିଷ ମିଶାଇଥିବା ଏହି ସ୍ୱାସ୍ଥ୍ୟକର୍ମୀଙ୍କ ଫନ୍ଦି ବୁଝି ନପାରି ପରିବାରର ୪ ସଦସ୍ୟ ଏହି ଔଷଧ ଖାଇଦେଇଥିଲେ ।
ଟିକା ନେଇ କାରୁପାନକୋରୁନ୍ଦର, ତାଙ୍କ ପତ୍ନୀ ମଲ୍ଲିକା, କନ୍ୟା ଦୀପା ଓ ସହାୟିକା କୁପାଲ ଗୁରୁତର ହୋଇ ପଡ଼ିଥିଲେ । ବିଷକ୍ରିୟାରେ ମଲ୍ଲିକା, ଦୀପା ଓ କୁପଲଙ୍କ ମୃତ୍ୟୁ ଘଟିଥିବା ବେଳେ କାରୁପାନକୋରୁନ୍ଦର ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ପୋଲିସ କଲ୍ୟାଣସୁନ୍ଦରମ ଓ ସାବରିଙ୍କୁ ଗିରଫ କରି ତଦନ୍ତ ଜାରି ରଖିଛି । ସେମାନଙ୍କ ଜାମିନ ଖାରଜ ହେବା ପରେ ୧୫ ଦିନ ଲାଗି ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।
