ଆମ୍ ଆଦମୀ ପାର୍ଟିକୁ ଝଟକା: ଆପ୍ ଛାଡ଼ି ବିଜେପିରେ ସାମିଲ ହେଲେ ତିନି କାଉନସିଲର

ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପରେ ବି ଆମ୍ ଆଦମୀ ପାର୍ଟିକୁ ଝଟକା ଲାଗିବା ବନ୍ଦ ହେଉନି । ହାତରୁ ଦିଲ୍ଲୀ ସିଂହାସନ ଯିବାର ୭ ଦିନ ପରେ ପୁଣି ଏକ ଝଟକା ଲାଗିଛି । ଦଳର ତିନି ଜଣ କାଉନସିଲର ଆପ ଛାଡି ବିଜେପିରେ ଯୋଗ ଦେଇଛନ୍ତି । ଦଳ ଛାଡିଥିବା ଏହି କାଉନସିଲରମାନେ ହେଲେ ଅନିତା ବସୋୟା, ନିଖିଲ ଚପରାନା ଏବଂ ଧର୍ମବୀର । ଅନିତା ଆଣ୍ଡ୍ରୁଜଗଞ୍ଜ, ନିଖିଲ ବଦରପୁର ଏବଂ ଧର୍ମବୀର ଆରକେ ପୁରମରୁ ଆପ ଟିକେଟରେ କାଉନସିଲର ଥିଲେ । ବିଜେପି ପ୍ରଦେଶ ଅଧ୍ୟକ୍ଷ ବିରେନ୍ଦ୍ର ସଚ୍ଚିଦେବାଙ୍କ ଉପସ୍ଥିତିରେ ଏମାନେ ବିଜେପିରେ ସାମିଲ ହୋଇଛନ୍ତି ।

ବିଜେପିରେ ସାମିଲ ହେବାକୁ ନେଇ ଦିଲ୍ଲୀ ରାଜନୀତି ପୁଣି ଥରେ ଉଷ୍ଣ ହୋଇଛି । ନିର୍ବାଚନ ଫଳାଫଳର ଏହା ସାଇଡ ଡିଫେକ୍ଟ ବୋଲି କୁହାଯାଉଛି । ନିର୍ବାଚନ ଫଳାଫଳ ବାହାରିବାର କିଛି ଦିନ ହୋଇନି ଲାଗୁଛି ଅରବିନ୍ଦ କେଜ୍ରିଓ୍ବାଲ ଏବଂ ତାଙ୍କ ଦଳ ଆପର ଖରାପ ସମୟ ଆରମ୍ଭ ହୋଇଯାଇଛି । ନିର୍ବାଚନ ପୂର୍ବରୁ ବିଜେପି ଆପକୁ ଝଟକା ଦେବା ଆରମ୍ଭ କରିଥିବା ବେଳେ ଫଳାଫଳ ଆସିବା ପରେ ମଧ୍ୟ ଏହା ଜାରି ରହିଛି । ଦିଲ୍ଲୀରେ ଗତ ୫ ତାରିଖରେ ଭୋଟ ପଡ଼ିଥିଲା । ଏହା ପୂର୍ବରୁ ୬ ଜଣ ବିଧାୟକ ଟିକେଟ କଟିବା ପୂର୍ବରୁ ବିଦ୍ରୋହ କରିଥିଲେ । ଏପରିକି ଏମାନେ ବିଜେପିରେ ସାମିଲ ହୋଇଯାଇଥିଲେ ।