IAS,IPSଙ୍କ ଫ୍ୟାକ୍ଟ୍ରି ହେଉଛି ଉତ୍ତରପ୍ରଦେଶର ଏହି ଗାଁ

ନନ୍ଦିଘୋଷ ବ୍ୟୁରୋ: ଉତ୍ତରପ୍ରଦେଶର ମାଧୋପଟ୍ଟି ଗ୍ରାମକୁ ୟୁପିଏସସିର କାରଖାନା କୁହାଯାଏ କାରଣ ଏଠାରୁ ବହୁସଂଖ୍ୟାରେ  ଆଇଏଏସ- ଆଇପିଏସ ଓ ପିସିଏସ ଅଧିକାରୀ ବାହାରିଛନ୍ତି । ୪ହଜାର ଜନସଂଖ୍ୟା ବିଶିଷ୍ଟ ଏହି ଗାଆଁରୁ ୪୦ରୁ ଅଧିକ ଅଧିକାରୀ ବଡ ବଡ ପଦରେ ନିଯୁକ୍ତି ପାଇଛନ୍ତି । ସେମାନଙ୍କ ମଧ୍ୟରୁ ଅନେକ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀ କାର୍ଯ୍ୟାଳୟରେ କାର୍ଯ୍ୟରତ ମଧ୍ୟ ଅଛନ୍ତି ।

ୟୁନିଅନ ଜନସେବା ଆୟୋଗ ବା UPSCର ପରୀକ୍ଷା ଦୁନିଆର ସବୁଠାରୁ କଠିନ ପରୀକ୍ଷା ବୋଲି ବିବେଚନା କରାଯାଏ । ଏହି ପରୀକ୍ଷାରେ ଦେଶର ଲକ୍ଷ ଲକ୍ଷ ଛାତ୍ରଛାତ୍ରୀ ପରୀକ୍ଷା ଦେଇଥାଆନ୍ତି କିନ୍ତୁ ତାଙ୍କ ମଧ୍ୟରୁ ୧୦୦୦ରୁ ୧୨୦୦ଜଣ ଏହି ପରୀକ୍ଷାରେ ଉତ୍ତୀର୍ଣ୍ଣ ହେଇପାରନ୍ତି । ସେଥିମଧ୍ୟରୁ କିଛି IAS ଅଧିକାରୀ ହେଇଥାଆନ୍ତି ତ ଅନ୍ୟକିଛି IPS ବା IFS ହେଇଥାଆନ୍ତି ।

କିନ୍ତୁ ଆଜି ଆମେ ଯେଉଁ ଗାଁ ବିଷୟରେ କହିବାକୁ ଯାଉଛୁ ସେହି ଗାଁକୁ UPSCକାରଖାନା କୁହାଯାଏ । ବାସ୍ତବରେ ଏହି ଗାଆଁରୁ ଏତେ ମାତ୍ରାରେ ଆଇଏଏସ ଓ ଆଇପିଏସ ବାହାରିଛନ୍ତି ଯାହାକୁ ଦେଖି ଲୋକମାନେ ଆଶ୍ଚର୍ଯ୍ୟ ହେଇଯାଇଛନ୍ତି । ଏହି ଗାଆଁର ନାମ ମାଧୋପଟ୍ଟି ଯାହା ଉତ୍ତରପ୍ରଦେଶର ଜୌନପୁରରେ ଅବସ୍ଥିତ । ଏହି ଗାଁ ଜୌନପୁରରୁ ପାଖାପାଖି ୭କିଲୋମିଟର ଦୂରତାରେ ଅବସ୍ଥିତ  । ଗଣମାଧ୍ୟମର ରିପୋର୍ଟସ ଅନୁଯାୟୀ ଏହି ଗାଁରେ ବର୍ତମାନ ସୁଦ୍ଧା ୪୦ରୁ ଅଧିକ IAS, IPS ଅଧିକାରୀ ବାହାରିଛନ୍ତି  । ସେମାନଙ୍କ ମଧ୍ୟରୁ ଅନେକ ବର୍ତ୍ତମାନ ବଡ ବଡ ପଦବୀରେ କାର୍ଯ୍ୟରତ ଅଛନ୍ତି । ଏହି ପଦ ଅଧିକାର କରି ଏମାନେ କେବଳ ନିଜ ପରିବାରକୁ ନୁହଁ ସଂପୂର୍ଣ୍ଣ ଗାଁକୁ ଗୌରାବନ୍ବିତ କରିଛନ୍ତି ।

ଗାଁର ଜନସଂଖ୍ୟା କେତେ ?

ଖବର ଅନୁଯାୟୀ ଗାଁର ଜନସଂଖ୍ୟା ପ୍ରାୟ ୪୦୦୦ ହେଇଥିବା ବେଳେ ଗାଁରେ ପାଖାପାଖି ୭୫ ପରିବାର ବାସ କରନ୍ତି । ଆଶ୍ଚର୍ଯ୍ୟର କଥା ହେଉଛିକି ଏହି ଗାଁରେ କେବଳ ପୁଅମାନେ ନୁହେଁ ଝିଅ ବୋହୂମାନେ ମଧ୍ୟ ଅଫିସର ବନିଛନ୍ତି । କୁହାଯାଏକି ଏହି ଗାଁର ଯୁବପୀଢି କଲେଜ ଯିବାମାତ୍ରେ ହିଁ ୟୁପିଏସସି ପ୍ରସ୍ତୁତରେ ଲାଗିପଡନ୍ତି ।

ଅଧିକାରୀ ବନିବାର ପରମ୍ପରା କେବେଠୁ ଆରମ୍ଭ ହେଇଥିଲା ?

ଦେଶ ସ୍ବାଧୀନ ହେବା ପରଠାରୁ ହିଁ ଗାଁ ଯୁବକମାନଙ୍କ ମଧ୍ୟରେ ୟୁପିଏସସି ପ୍ରତି କ୍ରେଜ ବଢିଯାଇଥିଲା । ୧୯୫୨ମସିହାରେ ଇନ୍ଦୁ ପ୍ରକାଶ ସିଂ ଆଇଏଫଏସ ଅଧିକାରୀ ହେଇଥିବାବେଳେ ୧୯୫୫ମସିହାରେ ବିନୟ କୁମାର ସିଂ ଆଇଏଏସ୍ ହେଇଥିଲେ ଯିଏ ପରବର୍ତ୍ତୀ କାଳରେ ବିହାରର ରାଜ୍ୟ ମୁଖ୍ୟ ସଚିବ ବନିଥିଲେ । ଏହି ଗାଁର ଏମିତି ୪ଭାଇଭଉଣୀ ଅଛନ୍ତି ଯିଏକି ୟୁପିଏସସି ପରୀକ୍ଷାରେ ସଫଳ ହେଇ ବଡ ବଡ ଅଧିକାରୀ ବନିଛନ୍ତି । କେବଳ ଏତିକି ନୁହଁ ଏହି ଗାଁର ଅନ୍ୟାନ୍ୟ ଯୁବକଯୁବତୀ ଭାଭା ପରମାଣୁ ଅନୁସନ୍ଧାନ କେନ୍ଦ୍ର ଏବଂ ଓ୍ବାର୍ଲ୍ଡ ବ୍ୟାଙ୍କରେ ମଧ୍ୟ କାର୍ଯ୍ୟ କରୁଛନ୍ତି ।