ନୂଆଦିଲ୍ଲୀ: ଭାରତୀୟଙ୍କୁ ଚଳିତ ବର୍ଷ ରେକର୍ଡ଼ ସଂଖ୍ୟକ ତାତି ସମ୍ଭାଳିବାକୁ ପଡ଼ିଛି । ଭାରତୀୟ ପାଣିପାଗ ବିଭାଗ ବା ଆଇଏମଡିର ଆକଳନ ଅନୁସାରେ ଦେଶରେ ୧୯୦୧ ମସିହା ପରଠାରୁ ସବୁଠାରୁ ଅଧିକ ଗରମ ମାସ ହେଉଛି ମାର୍ଚ୍ଚ । ଯେତେବେଳେ ଅଧିକତର ତାପମାତ୍ରା ରହିଛି ୧.୮୬ ଡିଗ୍ରୀ ସେଲସିୟସ୍ ।
ରିପୋର୍ଟ ଅନୁସାରେ ଦେଶରେ ମାର୍ଚ୍ଚ ମାସରେ ହାରାହାରି ତାପମାତ୍ରା ୩୩.୧୦ ଡିଗ୍ରୀ ସେଲସିୟସ୍ ରେକର୍ଡ଼ ହୋଇଛି । ଯାହା ସାମାନ୍ୟଠାରୁ ୧.୮୬ ଡିଗ୍ରୀ ସେଲସିୟସ୍ ଅଧିକ । ଏହି ସମୟରେ ହାରାହାରି ନିମ୍ନତମ ତାପମାତ୍ରା ୨୦.୨୪ ଡିଗ୍ରୀ ସେଲସିୟସ ରେକର୍ଡ଼ ହୋଇଛି । ଉତ୍ତର ପଶ୍ଚିମ ଅଞ୍ଚଳରେ ସବୁଠାରୁ ଅଧିକ ତାପାମତ୍ରା ରେକର୍ଡ଼ କରାଯାଇଛି । ଯାହା ସାମାନ୍ୟଠାରୁ ୩.୯୧ ଡିଗ୍ରୀ ସେଲସିୟସ ଅଧିକ ଥିଲା । ଅନ୍ୟପଟେ କେନ୍ଦ୍ରୀୟ ଅଞ୍ଚଳରେ ମାର୍ଚ୍ଚ ମାସରେ ୧.୬୨ ଡିଗ୍ରୀ ସେଲସିୟସ୍ ଅଧିକ ତାତି ବଢ଼ିଛି ।
ଭାରତରେ ମାର୍ଚ୍ଚରେ ହାରାହାରି ୮.୯ ଏମଏମ ବର୍ଷ ହୋଇଛି । ଯାହା ଲଙ୍ଗ୍ ପିରିୟଡ୍ ଆଭରେଜର ୩୦.୪ ଏମଏମରୁ ୭୧ ପ୍ରତିଶତ କମ୍ । ମାର୍ଚ୍ଚରେ ୧୯୦୯ରେ ୭.୨ ସେଣ୍ଟିମିଟର ଏବଂ ୧୯୦୮ରେ ୮.୭ ମିମି ବର୍ଷା ହୋଇଥିଲା । ଏଭଳି ସ୍ଥିତିରେ ଚଳିତ ବର୍ଷ ପୂର୍ବ ମାସରେ ୧୯୦୧ ମସିହା ପରେ ସବୁଠାରୁ କମ୍ ବୃଷ୍ଟିପାତ ରେକର୍ଡ଼ ହୋଇଛି ।
ଚଳିତ ମାର୍ଚ୍ଚ ମାସରେ ଦୁଇଟି ପର୍ଯ୍ୟାୟରେ ଗ୍ରୀଷ୍ମ ପ୍ରବାହ ଆସିଥିଲା। ପ୍ରଥମ ପ୍ରବାହଟି ମାର୍ଚ୍ଚ ୧୧ରୁ ମାର୍ଚ୍ଚ ୨୧ ମଧ୍ୟରେ ଥିବା ବେଳେ ଦ୍ୱିତୀୟଟି ମାର୍ଚ୍ଚ ୨୬ରେ ଆରମ୍ଭ ହୋଇ ଏପର୍ଯ୍ୟନ୍ତ ଚାଲିଛି ବୋଲି ପୁଣେସ୍ଥିତ ଭାରତୀୟ ପାଣିପାଗ ବିଭାଗର ‘କ୍ଲାଇମେଟ୍ ମନିଟରିଙ୍ଗ୍ ଆଣ୍ଡ୍ ପ୍ରେଡିକ୍ସନ୍ ଗ୍ରୁପ୍’ର ମୁଖ୍ୟ ଓ.ପି. ଶ୍ରୀଜିତ୍ ଗଣମାଧ୍ୟମକୁ କହିଛନ୍ତି। ତାଙ୍କ ମତରେ, ବୃଷ୍ଟିପାତର ଅଭାବ ମଧ୍ୟ ଗ୍ରୀଷ୍ମ ପ୍ରବାହର ଅନ୍ୟତମ କାରଣ।
ଅନ୍ୟ ବିଶେଷଜ୍ଞମାନେ କହୁଛନ୍ତିଯେ, ଅନାବୃଷ୍ଟି, ଉତ୍ତରପଶ୍ଚିମ ଏବଂ କେନ୍ଦ୍ରୀୟ ଭାରତକୁ ଲଗାଣ ଶୁଷ୍କ ଓ ଉତ୍ତପ୍ତ ପଶ୍ଚିମାବାୟୁ ପ୍ରବାହ ଗ୍ରୀଷ୍ମ ପ୍ରବାହ କରାଉଛି। ଆକାଶ ମେଘମୁକ୍ତ ରହୁଥିବାରୁ ପ୍ରଖର ସୂର୍ଯ୍ୟରଶ୍ମି ପଡ଼ିବା ଯୋଗୁଁ ମଧ୍ୟ ଉତ୍ତାପ ବୃଦ୍ଧି ପାଉଛି।
