ନନ୍ଦିଘୋଷ ବ୍ୟୁରୋ; ତୃତୀୟ ଥର ପାଇଁ ବୈତରଣୀ ଓ ସାଳନ୍ଦୀ ନଦୀର ଜଳସ୍ତର ବୃଦ୍ଧି ପାଇଛି। ଭଦ୍ରକ ଆଖୁଆପଦା ଆନିକଟ ନିକଟରେ ବୈତରଣୀ ନଦୀର ଜଳସ୍ତର ବିପଦ ସଂକେତ ଉପରେ ପ୍ରବାହିତ ହେଉଛି। ହଦଗଡ଼ ଡ୍ୟାମରୁ ୫ଟି ଗେଟ୍ ଦେଇ ବନ୍ୟାଜଳ ନିଷ୍କାସନ ହେଉଥିବାରୁ ଭଦ୍ରକ ରାଜଘାଟ ନିକଟରେ ସାଳନ୍ଦୀ ନଦୀ ମଧ୍ୟ ବିପଦ ସଂକେତ ଉପରେ ପ୍ରବାହିତ ହେଉଛି।
ବନ୍ୟାଜଳ ନିଷ୍କାସନରେ ସମୁଦ୍ର ଜୁଆର ଓ ନିର୍ମାଣାଧୀନ ମାଟିବନ୍ଧ ବାଧକ ସାଜିଛି। ଭଦ୍ରକ ସହରାଞ୍ଚଳର ତଳିଆ ଅଞ୍ଚଳ ସମେତ ଭଣ୍ଡାରିପୋଖରୀ, ଧାମନଗର, ଚାନ୍ଦବାଲି ଓ ତିହିଡ଼ି ବ୍ଲକର ୫୪ଟି ପଞ୍ଚାୟତ ବନ୍ୟା ଦ୍ୱାରା ପ୍ରଭାବିତ ହୋଇଛି। ଅନେକ ବିଦ୍ୟାଳୟରେ ବନ୍ୟାଜଳ ପଶିଛି। ସୁରକ୍ଷା ଦୃଷ୍ଟିରୁ ଆଜି ମଧ୍ୟ ଜିଲ୍ଲାର ୬ଟି ବ୍ଲକର ୨୬୯ଟି ବିଦ୍ୟାଳୟ ଓ ୫୭୬ଟି ଅଙ୍ଗନବାଡ଼ି କେନ୍ଦ୍ର ବନ୍ଦ ରହିଛି। ଦୀର୍ଘଦିନ ହେଲା କ୍ଷେତରେ ବନ୍ୟାଜଳ ଲହଡ଼ି ମାରୁଥିବାରୁ ଚାଷୀକୁଳ ହତାଶ ହୋଇପଡ଼ିଛନ୍ତି। ଆରଡ଼ି ନିକଟରେ ବୈତରଣୀ ନଦୀ କୂଳ ଲଂଘିବାରୁ ଗତ ୫ ଦିନ ହେଲା ଆଖଣ୍ଡଳମଣି-କୁଆଖିଆ ଜାତୀୟ ରାଜପଥ ଉପରେ ୪ରୁ ୫ ଫୁଟ୍ ଉଚ୍ଚରେ ବନ୍ୟାଜଳ ପ୍ରବାହିତ ହେଉଛି। ସେହିପରି ଗେଙ୍ଗୁଟି ଓ କୋଚିଳା ନଦୀରେ ଜଳସ୍ତର ବୃଦ୍ଧି ପାଇବାରୁ ଗାଁ ଦାଣ୍ଡ ସମେତ ଘରେ ମଧ୍ୟ ବନ୍ୟାପାଣି ପଶିଛି।
